52-133/2022

B A R N A - O G Ú T B Ú G V I N G A R M Á L A R Á Ð I Ð
Tinghúsvegur 7 • FO-100 Tórshavn • Tel: +298 306500 • bumr@bumr.fo
Løgtingið 	30. juni 2023
Mál: 22/22133-42
Viðgjørt: NKR
Svar
upp á
skrivligan § 52a fyrispurning nr. 52-133/2022 frá Liljuni Weihe, løgtingsmanni, settur Djóna
N. Joensen, landsstýrismanni í barna- og útbúgvingarmálum, um vetrarferiu
Fyrispurningurin er soljóðandi:
1. Nær kunnu næmingar og foreldur vænta at vetrarfrítíð verður sett í gildi?
2. Er ætlanin, at frívikan á vetri skal takast av summarfrítíðini hjá næmingunum, so hon verður
stytt niður í 7 vikur?
3. Hvussu langt er landsstýrismaðurin komin í fyrireikingunum av vetrarfrítíðini?
Svar
Til 1: Eftir ætlan verður vetrarfrítíð sett í gildið frá skúlaárinum 2024-2025, og tískil kunnu
næmingar, foreldur og onnur avvarðandi vænta, at fyrsta vetrarfrítíðin verður í viku 7 á vetri 2025.
Til 2: Ætlanin er, at frívikan á vetri skal takast av summarfrítíðini hjá næmingunum, soleiðis at
summarfrítíðin frameftir verður stytt niður í 7 vikur. Hetta kann gerast á tann hátt, at næmingarnir
koma í skúla eina viku fyrr í august, enn teir gera í dag, ella við at summarfrítíðin verður stytt partvíst
í juni og august. Áðrenn avgerð verður tikin um hetta, verða allir avvarðandi partar hoyrdir.
Til 3: Eg meti, at tað fer at koma væl við hjá okkara næmingum í fólkaskúlanum, at teir fáa ein viku
vetrarfrí. Veturin og tíðin frá jólum til páskir kann tykjast heldur long, drúgv, myrk og møðandi. Eg
vænti og vóni, at næmingarnir við eini fríviku í februar koma at hava meira orku, ídni og áhaldni til
at læra og fylgja undirvísingini um veturin. Harumframt eru tað børn, sum hava foreldur í hvør
sínum landi, og við hesi broyting verður tað ein fyrimunur at hava ein steðg í skúlagongdini í eina
viku í februar, soleiðis at tey børnini fáa høvi at vitja síni foreldur, sum búgva uttanlands, í friði og
náðum uttan at noyðast at hava fráveru frá skúlanum.

-- 1 of 2 --

B A R N A - O G Ú T B Ú G V I N G A R M Á L A R Á Ð I Ð
Tinghúsvegur 7 • FO-100 Tórshavn • Tel: +298 306500 • bumr@bumr.fo
2/2
Samstundis eri eg av tí fatan, at summarfrítíðin hjá næmingunum í dag er heldur long, at hetta er eitt
heldur langt tíðarskeið at vera burtur frá skúlanum, eins og nógvar familjur hava avbjóðingar við at
halda summarfrítíðina saman, tí flestu foreldur hava 5-6 vikur av frítíð.
Vinarliga heilsan
Djóni Nolsøe Joensen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Liljan Weihe, løgtingsmaður
Svarari: Djóni Nolsøe Joensen, landsstýrismaður í barna- og útbúgvingarmálum
Evni: Vetrarfrí
Spurningar:
1. Nær kunnu næmingar og foreldur vænta at vetrarfrítíð verður sett í gildi?
2. Er ætlanin, at frívikan á vetri skal takast av summarfrítíðini hjá næmingunum,
so hon verður stytt niður í 7 vikur?
3. Hvussu langt er landsstýrismaðurin komin í fyrireikingunum av vetrarfrítíðini?
Viðmerkingar:
Fólkaskúlanæmingar um alt landið eru farnir í summarfrí. Næstu 8 vikurnar skulu
fyllast við upplivingum, samveru og hugna.
Trupulleikin er tó, at foreldrini hjá næmingunum hava ikki 8 vikur summarfrí – helst
bara tríggjar samanhangandi vikur. Tað merkir, at hóast bæði foreldur taka tríggjar
samanhangandi vikur, so eru børnini einsamøll í tvær, um tey ikki hava aldur til
frítíðartilboð. Harafturat ber als ikki til at halda frítíð saman sum familja.
Um talan er um einligar uppihaldarar, so er uppaftur torførari at fáa frítíðina til at
hanga saman.
Hjá næmingunum kann tíðin frá jólum til páskir ofta tykjast drúgv og myrk. Tí hevði
ein steðgur á eini viku komið væl við hesa árstíð. Lærarar eru eisini forsprákarar fyri
at stytta summarfrítíðina og ístaðin leggja eina fríviku myrku tíðina.
Í februar í ár var landsstýrismaðurin í miðlunum og boðaði frá, at arbeitt verður við at
fáa vetrarfrí í fólkaskúlanum – møguliga longu frá komandi skúlaári.
Tí hesir spurningar.
Á Løgtingi, 23. juni 2023
Liljan Weihe

-- 1 of 1 --