52-119/2022

B A R N A - O G Ú T B Ú G V I N G A R M Á L A R Á Ð I Ð
Tinghúsvegur 7 • FO-100 Tórshavn • Tel: +298 306500 • bumr@bumr.fo
Løgtingið 23. juni 2023
Tinghúsveg 1-3 Mál: 22/22133-38
100 Tórshavn
Svar
upp á
skrivligan § 52a fyrispurning nr. 52-119/2022 frá Steffani Klein Poulsen, løgtingsmanni, settur
Djóna N. Joensen, landsstýrismanni í barna- og útbúgvingarmálum, um at verja børnini ímóti
porno og øðrum ágangi á internetinum.
Fyrispurningurin er soljóðandi:
1. Hvussu fer landsstýrismaðurin at raðfesta hetta málið í næstum?
2. Hvørjar ítøkiligar ætlanir hevur landsstýrismaðurin viðvíkjandi at seta filtur upp, sum verja
børnini ímóti porno og øðrum ágangi, á internetinum?
3. Hvørjar ítøkiligar ætlanir hevur landsstýrismaðurin viðvíkjandi at gera ein almennan
politikk, sum stuðlar og vegleiðir foreldrum í at verja síni børn ímóti porno og øðrum ágangi
á internetinum?
4. Nær kann væntast at hesar ætlanir blíva til veruleika?
Svar
Til 1: Tá tað kemur til at verja børn í heila tikið, so er hetta nakað, sum verður raðfest sera ovarlaga
í Barna- og útbúgvingarmálaráðnum, og tískil eri eg sum avvarðandi landsstýrismaður eisini áhugaður
í at verja børn móti møguligum ágangi, tað veri seg beinleiðis, umvegis talgildar miðlar ella á annan
hátt.
Í ráðnum verður tað í løtuni arbeitt við at eftirkanna, í hvønn mun lóggávuverkið tvørtur um geirar
kann verja børn og ung, og tá hetta arbeiðið er komið til enda einaferð í heyst, so ber vónandi til at
síggja, um neyðugt er at gera nakrar ítøkiligar lógarbroytingar og fyriskipanir, sum skulu verja børn
betur, her ímillum ímóti ágangi á netinum.
Til 2: Sum avvarðandi landsstýrismaður í barna- og útbúgvingarmálum, er tað mín uppgáva at
tryggja, at børn og ung ikki vera útsett fyri ágangi umvegis internetið, eitt nú tá tey eru innan skúlagátt.
Internetið kann og verður brúkt sum eitt skynsamt amboð í undirvísingini, men vit vita øll, at hetta
amboðið eisini kann hava avbjóðingar við sær, sum kunnu vera torførar hjá serliga børnum at lofta
einsamøll.
Í skúlans gerandisdegi arbeiða leiðsla og lærarar áhaldandi við at menna næminganna
talgildisførleikar og talgildisbúgving, og í samstarvi við SSP verður við neyðugum átøkum støðugt

-- 1 of 2 --

B A R N A - O G Ú T B Ú G V I N G A R M Á L A R Á Ð I Ð
Tinghúsvegur 7 • FO-100 Tórshavn • Tel: +298 306500 • bumr@bumr.fo
2/2
arbeitt við fyribyrging í mun til vansar og avbjóðingar á netinum, soleiðis at børnini læra at ferðast
trygt á netinum.
Í løtuni verður ikki arbeitt beinleiðis við at seta nakað filtur upp innan undirvísingarkervi, sum kann
verja ímóti ágangi á internetinum.
Umframt at hugsa forðandi tekniskar loysnir, meti eg tað vera sera umráðandi, at vit í okkara
dagstovnum og fólkaskúlum arbeiða við at upplýsa, kunna og undirvísa okkara børnum um rættan
atburð á internetinum. Í fólkaskúlanum hava vit kravda undirvísingarevni heilsukunnleiki og
seksuallæra, og í næstum verður eftir ætlan sett sjøtul á arbeiðið at endurskoða námsætlanina innan
hetta evnið. Í samsvari við skúlans støðisnámsætlan hevur støðuførleikin talgildisbúgving sera stóran
týdning. Við talgildisbúgving snýr tað seg eisini um næminganna atferð á talgildum miðlum, har
endamálið er at búgva næmingarnar til at vera virknar, sjálvstøðugar, kritiskar og fólkaræðisligar
borgarar í einum talgildum samfelag.
Til 3: Tað er umráðandi, at vit sum almennur myndugleiki stuðla og vegleiða foreldrum í at verja síni
børn ímóti porno og øðrum ágangi á internetinum. Eg taki undir við, at vit eiga at hava ein almennan
politikk á økinum, og hetta er nakað, sum vit í ráðnum kom at viðgera nærri.
Til 4: Okkara arbeiði við at fáa hesar ætlanir til veruleika byrjar í heyst, og framyvir fer tað áhaldandi
at verða arbeitt við at verja okkara børn ímóti ágangi á netinum, og hetta arbeiði má frameftir støðugt
verða tillagað í mun til komandi tøkniligu menning við tess fyrimunum, vansum og møguligum
avbjóðingum.
Vinarliga heilsan
Djóni Nolsøe Joensen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Steffan Klein Poulsen, løgtingsmaður
Svarari: Djóni Nolsøe Joensen, landsstýrismaður í barna- og útbúgvingarmálum
Evni: Verja børnini ímóti porno og øðrum ágangi á internetinum
Spurningar:
1. Hvussu fer landsstýrismaðurin at raðfesta hetta málið í næstum?
2. Hvørjar ítøkiligar ætlanir hevur landsstýrismaðurin viðvíkjandi at seta filtur
upp, sum verja børnini ímóti porno og øðrum ágangi, á internetinum?
3. Hvørjar ítøkiligar ætlanir hevur landsstýrismaðurin viðvíkjandi at gera ein
almennan politikk, sum stuðlar og vegleiðir foreldrum í at verja síni børn ímóti
porno og øðrum ágangi á internetinum?
4. Nær kann væntast at hesar ætlanir blíva til veruleika?
Viðmerkingar:
Tann 3. mai 2023 tók eitt samt Løgting undir við at heita á landsstýrið um at verja
børnini ímóti porno og øðrum ágangi á internetinum.
Áheitanin var soleiðis orðað:
“Løgtingið heitir á landsstýrið um at kanna møguleikarnar fyri tekniskum loysnum, ið
verja børnini ímóti porno og øðrum ágangi á internetinum og at gera ein almennan
politikk um, hvussu foreldur verja síni børn á bestan hátt og leggja fram neyðug
lógaruppskot í hesum sambandi.”
Uppskotið, ið varð samtykt, er soleiðis í tveimum pørtum:
i) At seta filtur upp, sum skánar børnini fyri porno og øðrum ágangi á
internetinum.
ii) Gera ein almennan politikk, sum vegleiðir og stuðlar foreldrum í at verja
síni børn ímóti porno og øðrum ágangi á internetinum.
Fyrispurningurin verður settur fyri at hoyra, hvussu landsstýrið hevur móttikið hesa
áheitanina, og hvussu hetta álvarsmál verður raðfest í nærmastu framtíð.
Á Løgtingi, 12. juni 2023
Steffan Klein Poulsen

-- 1 of 1 --