52-098/2022

FISKIVINNU- OG SAMFERÐSLUMÁLARÁÐIÐ
M i n i s t r y o f F i s h e r i e s a n d I n f r a s t r u c t u r e
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
22. mai 2023
Mál: 23/10754-2
(at tilskila í svari)
Tygara skriv: 52-098/2022
Svar til § 52 a fyrispurning frá Eiriki í Jákupsstovu, løgtingsmanni, settur Dennis
Holm, landsstýrismanni í fiskivinnu- og samferðslumálum, um økta rúskoyring
seinastu árini
Fyrispurningurin er soljóðandi:
1. Hvørjar tankar ger landsstýrismaðurin sær, nú tað vísir seg, at tølini fyri tey, sum
verða tikin fyri rúskoyring, eru hækkað munandi seinastu árini - serliga í yngra
endanum?
2. Hevur landsstýrismaðurin ætlanir um at seta átøk í verk fyri at broyta hesa
gongdina?
Svar til spurning 1
Á aðalfundi hjá Ráðnum fyri Ferðslutrygd í apríl varð kunnað um vaksandi trupulleikan við
rúskoyring. Rúskoyring umfatar bæði koyring, har førarin er ávirkaður av rúsdrekka, og har
førarin er ávirkaður av rúsevnum, ikki fyriskrivaðum heilivági o.tíl.
Rúskoyring verður sum heild ikki góðtikin í dagsins samfelagi. Hetta er úrslit av m.a.
áhaldandi rúsátøkum og løgreglueftirliti, men serliga broytingin í promillumarkinum hevur
broytt nógv á økinum.
Tó síggja vit nú tíverri eitt mótrák. Tølini fyri rúskoyring eru hækkað nógv seinastu fáu
árini. Ikki einans í Føroyum, men eisini í londunum kring okkum.
Hetta er nakað, sum vit, bæði avvarðandi myndugleikar og samfelagið sum heild, eiga at
taka í størsta álvara, og eiga vit at seta tiltøk í verk fyri at fáa gongdina á beint aftur.
Svar til spurning 2
Tað er ongin skjót loysn á hesum álvarsliga trupulleika. Ein hugburðsbroyting skal heilt víst
til, og við at seta miðvíst inn við eitt nú upplýsing, røkka vit longst. Her er Ráðið fyri

-- 1 of 2 --

Fiskivinnu- og samferðslumálaráðið
2/2
Ferðslutrygd ein týdningarmikil samstarvspartur, umframt at “Ferðslutrygdarætlanin fyri
Føroyar 2019-27” eisini er ein týðandi táttur, tá arbeiðið skal leggjast til rættis.
Fyri fokusøkið “rúskoyring” í Ferðslutrygdarætlanini eru tvey deilmál og 11 tilmæli.
Deilmálini eru, at talið av ferðsluvanlukkum við rúsdrekka/rúsevnum skal vera 30% lægri í
2027 í mun til tølini frá 2018, og at hugburðurin hjá føroyingum til rúsdrekka- og
rúsevnakoyring skal fylgjast við framhaldandi hugburðskanningum.
Ætlanin er eisini at endurskoða ásetingarnar í Ferðslulógini um rúsdrekkakoyring,
frádøming og revsing. Um ein førari av einum akfari verður steðgaður við 0,2-0,5 í
promillu, gevur hetta eina treytaða frádøming av førararættinum. Hetta kundi verið broytt
til treytaleysa frádøming, eins og tað ger, tá promillan er yvir 0,5.
Fær ein førari undir útbúgving bót fyri brot á ferðslulógina, fær hann avsláttur, og bótin fer
niður í helvt. Henda avsláttarskipan verður nú endurskoðað.
Leggjast kann afturat, at í næstum verða broytingar í Ferðslulógini sendar í almenna
hoyring. Ein av ætlaðu broytingunum er kravið um luttøku á R/F-skeiði (skeið í rúsdrekka
og ferðslu). Í dag eru tað bert fólk, ið missa koyrirættin vegna rúsdrekkakoyring, sum skulu
luttaka á hesum skeiði, áðrenn tey kunnu taka koyrikortið aftur. Ætlaða broytingin hevur
við sær, at skeiðið verður víðkað til eisini at fevna um fólk, sum hava mist koyrirættin
vegna rúskoyring. Hetta loysir tó ikki verandi trupulleika, men kann vera við til at forða
fyri, at slíkt hendir aftur.
Dennis Holm
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eirikur í Jákupsstovu, løgtingsmaður
Svarari: Dennis Holm, landsstýrismaður í fiskivinnu- og samferðslumálum
Evni: Økt rúskoyring seinastu árini
Spurningar:
1. Hvørjar tankar ger landsstýrismaðurin sær, nú tað vísir seg, at tølini fyri tey,
sum verða tikin fyri rúskoyring, eru hækkað munandi seinastu árini - serliga í
yngra endanum?
2. Hevur landsstýrismaðurin ætlanir um at seta átøk í verk fyri at broyta hesa
gongdina?
Viðmerkingar:
Um dagarnar hevur miðlaumrøða verið um, at talið á teimum, sum verða tikin fyri
rúskoyring, er hækkað munandi seinastu 5 árini. Hetta ger seg galdandi í flestu
aldursbólkum, men sum skilst er tað serliga í yngsta endanum, at trupulleikin er
vaksin. Tað kunnu sjálvandi vera nógvar ymiskar orsakir til hetta, men tað broytir
ikki, at tað er ein gongd, sum ikki er gagnlig fyri okkara samfelag. Tað er hinvegin ein
gongd, sum er beinleiðis vandamikil, og tað var í miðlaumrøðuni nevnt, at tað í løtuni
nærum bert verður bíðað eftir næstu deyðsvanlukkuni, har rúsdrekka ella annar rúsur
er partur av hendingini.
Í hesum sambandi hevði verið áhugavert at vitað, um landsstýrismaðurin er tilvitaður
um hesa gongdina, og um tað eru átøk, sum hann hevur í hyggju at fremja fyri at
broyta gongdina.
Á Løgtingi, 10. mai 2023
Eirikur í Jákupsstovu

-- 1 of 1 --