52-095/2022

Dagf. 22. mai 2023
HMR j. nr. 23/10808
Margit Stórá
landsstýriskvinna
Svar
upp á
Fyrispurningur nr. 52-095/2022 eftir § 52 a í tingskipanini um sálarliga skaðastovu, frá
Hervør Pálsdóttir, løgtingskvinnu.
Spurningarnir vóru soljóðandi:
1. Hvussu gongur við fyrireikingunum av sálarligu skaðastovuni?
2. Nær kann væntast, at sálarliga skaðastovan letur upp?
Svar:
Til spurning 1
Fyrst og fremst vil eg gera vart við, at tað ikki verður arbeitt við at lata eina sálarliga skaðastovu
upp á Landssjúkrahúsinum. Hinvegin verður arbeitt við at styrkja læknavaktina við psykiatriskum
førleikum, so læknavaktin 1870 verður betur før fyri at hjálpa í sálarligum bráðstøðum. Hetta er
eisini í samsvar við orðingina í fíggjarlógini fyri 2023. Eisini er hetta í samsvar við
samgonguskjalið, har tað framgongur, at sálarligar og likamligar sjúkur skulu javnsetast. Um fólk í
dag hava tørv á lækna, eftir vanliga arbeiðstíð, ringja tey til læknavaktina 1870. Hetta skal sjálvandi
vera fyri øll, tað vil siga bæði fyri tey sum hava sálarligar, og tey sum hava likamligar trupulleikar.
Eg meti ikki, at vit skulu seta í verk serskipanir fyri tey, ið hava sálarligar trupulleikar, men heldur
innrætta skipanirnar soleiðis, at vit kunnu bjóða alt á einum stað – tað vil siga, at øll ringja til
læknavaktina 1870.
Fyrireikingarnar eru í gongd, og játtan er sett av til endamálið í fíggjarlógini fyri 2023. Upprunaliga
uppskotið til loysn var eitt tilmæli í Heildarætlanini fyri sálarliga heilsu frá 2018, men sambært
Sjúkrahúsverkinum eru viðurskiftini hesi árini nakað broytt, m.a. er tað vorðið munandi torførari at
fáa sjúkrarøktarfrøðingar, sum vóru ein partur av upprunaloysnini.
Neyðugt er tí at gera nakrar tillagingar í mun til upprunaligu ætlanina. Ætlanin er at styrkja
læknavaktina 1870 – sum skipanarliga hoyrir undir kommunulæknarnar - við førleikum og tilfeingi
frá Psykiatriska deplinum á Landssjúkrahúsinum. Hetta skal gerast í samstarvi partanna millum.

-- 1 of 2 --

Nakað av virkseminum verður telefonisk ráðgeving, og arbeitt verður við at styrkja førleikarnar á
hesum økinum.
Til spurning 2
Væntað verður, at virksemið kann byrja til heystar.
Heilsumálaráðið, 22. mai 2023
Margit Stórá
landsstýriskvinna

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Hervør Pálsdóttir, løgtingsmaður
Svarari: Margit Stórá, landsstýrismaður í heilsumálum
Evni: Sálarlig skaðastova
Spurningar:
1. Hvussu gongur við fyrireikingunum av sálarligu skaðastovuni?
2. Nær kann væntast, at sálarliga skaðastovan letur upp?
Viðmerkingar:
Í eina tíð hevur verið arbeitt við at lata eina sálarliga skaðastovu upp á skaðastovuni á
Landssjúkrahúsinum, so at vit kunnu veita bráðfeingishjálp til teirra, ið tørva tað. At
kunna veita sálarliga bráðfeingishjálp er ein liður í at javnseta sálarliga heilsu og
kropsliga heilsu. Hesin fyrispurningurin verður settur fyri at fáa greiðu á, hvussu tað
gongur við arbeiðinum við sálarligu skaðastovuni.
Á Løgtingi, 10. mai 2023
Hervør Pálsdóttir

-- 1 of 1 --