52-075/2022

Dagf. 30. mars 2023
HMR j. nr. 23/08081-6
Margit Stórá
landsstýrismaður
Svar
upp á
Fyrispurning nr. 075/2022 eftir § 52 a í tingskipanini um útboð av nýggjum reinsiverki til
Landssjúkrahúsið, frá Anniku Olsen, løgtingsmanni
Spurningarnir vóru soljóðandi:
1. Er nýggja reinsiverkið á Landssjúkrahúsinum bjóðað alment út?
2. Eru møguleikarnir at nýta føroyskar ráðgevarar í sambandi við nýtt reinsiverk til
Landssjúkrahúsið kannaðir?
3. Er áheitan komin frá føroyskum ráðgevum um at sleppa at bjóða uppá reinsiverkið?
4. Hvørja áskoðan hevur landsstýrismaðurin á at brúka føroyskar veitarar ?
Svar:
Til spurning 1
Arbeiðið, at útvega eitt nýtt reinsiverk, er enn í byrjanarstøðu. Talan er um, at Landssjúkrahúsið
og Landsverk kanna, hvørjar loysnir og hvør tøkni er tøk innan økið.
Til spurning 2
Í sambandi við kanningar og fyrireikingar hava Landssjúkrahúsið og Landsverk verið í sambandi
við bæði føroyskar og útlendskar ráðgevarar.
Til spurning 3
Landssjúkrahúsið og Landsverk hava longu nýtt føroyskan ráðgeva í sambandi við fyrireikingarnar.
Harumframt hevur ein føroyskur ráðgevi bjóðað seg fram til hesa verkætlanina.
Landssjúkrahúsið og Landsverk fáa javnan áheitanir frá ráðgevum, ið bjóða seg fram til ymiskar
uppgávur. Viðvíkjandi reinsiverkinum, so verður framvegis kannað, hvørjar loysnir egna seg best.

-- 1 of 2 --

Um farið verður víðari við verkætlanini, skal útboð gerast, og ráðgevar kunnu tá bjóða uppá
prosjekteringina av einum nýggjum reinsiverki. Inntil útboðið er fyrireikað og gjørt, er ikki
møguligt hjá ráðgevum at bjóða uppá prosjekteringina.
Til spurning 4
Landsstýriskvinnan heldur, at tað hevur stóran týdning at brúka føroyskar veitarar, tá ið tað letur seg
gera, og at tað er gott, at vit her í Føroyum hava serkunnleika innan ávís serøki.
Málið við einum nýggjum reinsiverki er ikki komið so langt at komið er til at skula bjóða tað út.
Heilsumálaráðið, 30. mars 2023
Margit Stórá
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Annika Olsen, løgtingsmaður
Svarari: Margit Stórá, landsstýrismaður í heilsumálum
Evni: Útboð av nýggjum reinsiverki til Landssjúkrahúsið
Spurningar:
1. Er nýggja reinsiverkið á Landssjúkrahúsinum bjóðað alment út?
2. Eru møguleikarnir at nýta føroyskar ráðgevarar í sambandi við nýtt reinsiverk
til Landssjúkrahúsið kannaðir?
3. Er áheitan komin frá føroyskum ráðgevum um at sleppa at bjóða uppá
reinsiverkið?
4. Hvørja áskoðan hevur landsstýrismaðurin á at brúka føroyskar veitarar ?
Viðmerkingar:
Í Føroyum eru tvær verkfrøðingafyritøkur, sum hava fakligan sterkan førleika til at
átaka sær uppgávuna at projektera og loysa avbjóðingina við nýggja reinsiverkinum á
Landssjúkrahúsinum. Hesar báðar føroysku fyritøkurnar hava brúkt nógva orku upp á
at fáa neyðugan førleika sum krevst til slíkar verkætlanir og hava uppbygt sær drúgvar
royndir við serkunnleika innan hetta ávísa serøkið, sum umfatar reinsiverk við meira.
Men sum skilst eru hesar fyritøkur valdar frá til frama fyri danskan veitara. Leggjast
skal eisini afturat, at føroysku ráðgevararnir hava bjóðað seg fram hjá Landsverki at
koma við einum uppskoti til loysn upp á nýggja reinsiverkið á Landssjúkrahúsinum,
uttan at nakað úrslit er spurt burturúr. Tað er umráðandi, at tílíkar verkætlanir hjá tí
almenna verða bodnar út, og at føroyskir veitarar hava møguleika at bjóða. Tí verða
hesir spurningar settir landsstýrismanninum.
Á Løgtingi, 28. mars 2023
Annika Olsen

-- 1 of 1 --