52-065/2022

A L M A N N A – O G M E N T A M Á L A R Á Ð I Ð
M I N I S T R Y O F S O C I A L A F F A I R S A N D C U L T U R E
Eirargarður 2 • FO-100 Tórshavn
 (+298) 30 40 00 •  ammr@ammr.fo • www.ammr.fo
Løgtingið 14. mars 2023
Tinghúsvegur 1-3Postboks 208 Mál: 23/06137
110 Tórshavn Tygara skriv:
Viðgjørt: AKSS
Nr. 52-065/2022
Svar
uppá
skrivligan fyrispurning nr. 52-065/2022 eftir tingskipanini § 52a til Sirið Stenberg,
landsstýrismann í almanna- og mentamálum, frá Hervør Pálsdóttir, løgtingsmanni, um
heimloysi.
Fyrispurningurin er soljóðandi:
1. Ætlar landsstýrismaður at gera eina heildarætlan fyri at basa heimloysi í Føroyum?
2. Verður tað arbeitt við at fáa hagtøl fyri heimloysi í Føroyum?
Svar:
Til nr. 1
Heimloysi er eitt breitt hugtak, ið kann fevna um fleiri ymiskar støður og málbólkar, við
ymsum tørvum og avbjóðingum. Orsøkin til heimloysi vísir seg at vera samansett, og hongur
hetta neyvt saman við støðuni hjá tí einstaka. Talan verður tí ongantíð um eina loysn.
Tvørturímóti er neyðugt at arbeiða á fleiri ymiskum mótum, og krevur hetta at fleiri partar
lyfta í felag.
Ásannandi at trupulleikin er samansettur, er ráðið farið undir eina tilgongd at kortleggja økið
fyri at fáa nøktandi vitanargrundarlag, og út frá hesum er ætlanin at gera uppskot til, hvørji
munagóð átøk kunnu gerast. Tá ið hetta arbeiðið er liðugt, kann støða takast til, um farast skal
undir at gera eina heildarætlan, ella um arbeiðast skal við øðrum loysnum, við tí fyri eyga at
basa heimloysi í Føroyum.
Samstundis sum arbeitt verður við at kortleggja økið, er landsstýriskvinnan farin undir nøkur
ítøkilig átøk fyri heimleys, ið hava munandi sálarligar og sosialar trupulleikar.
Sum dømi kann nevnast, at Almanna- og mentamálaráðið er í samskifti við Tórshavnar
kommunu um at gera nøkur felags átøk fyri at betra um korini hjá teimum heimleysu, sum

-- 1 of 2 --

A L M A N N A - O G M E N T A M Á L A R Á Ð I Ð
Síða 2 av 2
halda til í miðbýnum. Saman við avvarðandi pørtum er farið undir eitt arbeiði, við tí endamáli
at finna fram til eina virðiliga loysn, ið gagnar øllum pørtum.
Til nr. 2
Sum spyrjarin vísir á í viðmerkingunum til spurningin, hevur Hagstova Føroya nýliga
kunngjørt hagtøl um gistingar á herbergum í Føroyum, og sostatt er komið væl áleiðis við
hagtølunum. Tað var Almannamálaráðið, sum saman við Hagstovuni tók stig til at fara undir
at menna hagtøl um heimloysi í Føroyum, og tað er sostatt Hagstovan, sum hevur savnað inn,
og sum stendur fyri almannakunngerðing av hagtølunum.
Sum Hagstovan skrivar á heimasíðuni í sambandi við almannakunngerðingina av hagtølunum,
eru tølini gjørd eftir flokkingini “European Typology of Homelessness and housing
exclusion” stytt ETHOS. Allýsingin sambært ETHOS fevnir breitt, og er býtt upp í 13
flokkingar. Tað er ikki vanligt í øðrum londum at hava almenn hagtøl um allar flokkingarnar,
men at avmarka seg til tey, sum eru uttan tak yvir høvdið, og tey, sum ikki hava egnan bústað.
Hagtølini, sum Hagstovan hevur almannakunngjørt, fevna um gistingar á herbergum og
náttarherbergum.
Ætlanin er, at hagtølini skulu víðkast til eisini at fevna um persónar, sum sova í almenna
rúminum, og tað hevur ligið í kortunum, at Almanna- og mentamálaráðið skal standa fyri
hesum síðsta partinum, men enn er ikki klárt at fara undir at víðka hagtølini. Arbeiðið við
heimleysproblematikkinum er nú uppraðfest munandi, og stig verða tikin á fleiri mótum.
Hagtøl um heimleys er ein neyðugur partur av loysnum, ið byggja á haldgott grundarlag.
Tórshavn, 14. mars 2023
Sirið Stenberg
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Hervør Pálsdóttir, løgtingsmaður
Svarari: Sirið Stenberg, landsstýrismaður í almannamálum
Evni: Heimloysi
Spurningar:
1. Ætlar landsstýrismaður at gera eina heildarætlan fyri at basa heimloysi í
Føroyum?
2. Verður tað arbeitt við at fáa hagtøl fyri heimloysi í Føroyum?
Viðmerkingar:
Í vikuni hevur Hagstovan kunngjørt uppgerð fyri gistingar á herbergunum í Føroyum.
Uppgerðin vísir, at kømrini á báðum herbergunum vóru upptikin mest sum allar dagar
í fjør. Í november var Martin Kúrberg eisini í útvarpinum og greiddi frá, at alsamt
fleiri ung í 20’unum gista á Herberginum. Hesi ungu hava oftani havt tilknýti til
Kriminalforsorgina og/ella Psykiatriska depilin. Fyri at koma hesum trupulleikanum
til lívs er neyðugt at hava eina heildarætlan fyri, hvussu vit skulu basa heimloysi í
Føroyum. Tí verður hesin fyrispurningurin settur.
Á Løgtingi, 3. mars 2023
Hervør Pálsdóttir

-- 1 of 1 --