52-056/2022

A L M A N N A – O G M E N T A M Á L A R Á Ð I Ð
M I N I S T R Y O F S O C I A L A F F A I R S A N D C U L T U R E
Eirargarður 2 • FO-100 Tórshavn
 (+298) 30 40 00 •  ammr@ammr.fo • www.ammr.fo
Nr. 52-056/2022
Svar uppá skrivligan fyrispurning nr. 52-056/2022 eftir tingskipanini § 52a til Sirið
Stenberg, landsstýrismann í almanna- og mentamálum, frá Sólvit Emilsson Nolsø,
løgtingsmanni, um umlættingar- og frítíðartilboð.
Fyrispurningurin ljóðar soleiðis:
Spurningar:
1. Hvørjum loysnum arbeiðir landsstýrismaðurin við, so tørvurin á umlættingar- og
frítíðartilboðum verður loystur?
2. Hvørjum loysnum arbeiðir landsstýrismaðurin við, so tørvurin á bústovnum og
sambýlum til fólk, sum bera brek, verður loystur?
Svar:
Almannaverkið hevur umlagt part av sínum virksemi, ið ger at fleiri børn kunnu fáa
frítíðartilboð, og arbeitt verður støðugt við at finna loysnir, soleiðis at børnini, ið standa á
bíðilista, fáa tilboð.
Í fíggjarlógaruppskotinum, ið fall burtur, var ætlanin at hækka játtanina til frítíðartilboð.
Landsstýriskvinnan heldur fast í hesi raðfesting í fíggjarlógaruppskotinum, ið verður lagt fyri
Løgtingið í næstum.
Orsøkin til bíðilistarnar er samansett, og tí verða spurningarnar svaraðir undir einum.
Vit hava avbjóðingar, bæði í mun til at hava hóskandi hølir og starvsfólk á vælferðarøkinum.
Fyri at gagnnýta starvsfólkaorkuna betur, styrkja fakligheitina, og við hesum eisini veita eina
betri tænastu, er í stóran mun neyðugt at byggja størri eindir, sum tó eru skipaðar í smærri
eindum, við atliti at teimum ymsu málbólkunum.
Saman við avvarðandi pørtum er landsstýriskvinnan farin undir at gera eina langtíðarætlan,
sum byggir víðari á arbeiðið, ið undanfarna samgonga setti í verk. Ætlanin er at gera eina
ætlan fyri komandi tíggju árini, ið skal virka við til, at tørvurin á bústovnum, umlætting og
frítíðartilboðum til fólk, ið bera brek, verður nøktaður.
Løgtingið
Tinghúsvegur 1-3
110 Tórshavn
3. februar 2023
Mál: 23/02412
Tygara skriv:
Viðgjørt: Ann Kristina S. Simonsen

-- 1 of 2 --

A L M A N N A - O G M E N T A M Á L A R Á Ð I Ð
M I N I S T R Y O F S O C I A L A F F A I R S A N D C U L T U R E
Síða 2 av 2
Ætlanin fevnir um at byggja bústovnar, sambýlir, umlættingartilboð og virknistilboð, harundir
frítíðartilboð. Miðað verður eftir at fara undir at byggja í minsta lagi ein stovn um árið
komandi árini. Bygt verður kring alt landið eftir tørvi.
Í løtuni eru tríggjar byggiverkætlanir í gongd í miðstaðarøkinum, ið fara at økja um talið av
plássum til bú-, umlættingar- og frítíðartilboð. Tveir av hesum stovnum lata eftir ætlan upp í
ár, og tann triði væntandi um ársskiftið í 2023/2024.
Almannaverkið hevur gjørt leiguavtalu um ein stovn í Klaksvík, sum letur upp í ár. Í
fíggjarlógaruppskotinum, sum verður lagt fyri Løgtingið í næstum, heldur landsstýriskvinnan
harumframt fast við ætlanina, sum var í fíggjarlógaruppskotinum, ið fall burtur, at játta pening
til ein stovn í Suðuroy. Báðir stovnar fara at hava bútilboð og umlætting. Eisini byggir
Bústaðir búfelagsskapir, sum Almannaverkið ávísir til.
Samstundis sum at arbeitt verður við eini langtíðarætlan, verður støðugt arbeitt við at útvega
hóskandi hølir og starvsfólk fyri at gera tað møguligt at veita teimum á bíðilista neyðuga
tænastu.
Tørvurin á frítíðartilboði broytist frá børn eru um 10 ár til tey gerast 18 ára gomul. Ásannandi
at fleiri av børnunum ikki tørva dagligt tilboð, arbeiðir Almannaverkið harumframt við
klubbtilboðum um kvøldið nakrar dagar um vikuna til ung. Høvuðsendamálið er tá at geva
teimum ungu eitt tilboð, sum líkist tí, ið ung fólk annars hava at fara til í frítíðini, og at tey
gerast partur av einum netverki, sum kann brúkast aftrat skipaða tilboðnum, og bæði kann
virka motiverandi og mennandi fyri tey.
Tórshavn, 3. februar 2023
Sirið Stenberg
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Sólvit Emilsson Nolsø, tingmaður
Svarari: Sirið Stenberg, landsstýrismaður í almanna- og mentamálum
Evni: Umlættingar- og frítíðartilboð
Spurningar:
1. Hvørjum loysnum arbeiðir landsstýrismaðurin við, so tørvurin á umlættingar-
og frítíðartilboðum verður loystur?
2. Hvørjum loysnum arbeiðir landsstýrismaðurin við, so tørvurin á bústovnum og
sambýlum til fólk, sum bera brek, verður loystur?
Viðmerkingar:
Seinastu árini er eru alt fleiri fólk løgd afturat á bíðilistanum til bústaðar-,
umlættingar- og frítíðartilboð frá Almannaverkinum. Fleiri fólk bíða eisini leingi eftir
einum tilboði. Fleiri av hesum málunum eru eisini blivin almenn umvegis miðlar, har
tað oftast eru foreldur, sum gera vart við manglandi tilboð til børn síni.
Tað hevur verið arbeitt við fleiri loysnum. Millum annað við at útvega
Almannaverkinum størri eindir. Endamálið við teimum størru eindunum hevur verið
at tryggja tilboðini betur. Størri eindir hava eisini størri starvsfólkahópar við sær, ið
skapa betri starvsfólkatrivnað.
Frágreiðingin Í Góðum Hondum, sum varð gjørd í 2022, leggur upp til at útvega
Almannaverkinum størri eindir og savna tilboðini, sum verkið skal bjóða, á færri og
størri eindum. Leisturin er royndur í nøkrum førum og við góðum royndum. Seinasta
dømi er gamli musikkskúlin á Frúutrøð í Havn, sum Almannaverkið umsíðir hevur
fingið at brúka til frítíðartilboð.
Neyðugt er at arbeiða miðvíst við at loysa trupulleikan, tí sum land hava vit bundið
okkum til at veita nakrar grundleggjandi tænastur til fólk, sum hava ein serligan tørv.
Hetta eiga vit at loysa sum skjótast og á skilabestan hátt.
Á Løgtingi, 24. januar 2023
Sólvit E. Nolsø

-- 1 of 1 --