52-049/2022

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Løgtingið
Svar
uppá
skrivligan fyrispurning nr. 49/2022 eftir tingskipanini § 52a til Bárð á Steig Nielsen, løgmann,
frá Aksel V. Johannesen, løgtingsmanni, um samkynd og Føroya «grundlóg»
Fyrispurningurin var soljóðandi:
1. Er tað rætt, sum landsstýrismaðurin í uttanríkis- og mentamálum, Jenis av Rana, sigur, at tað
stríðir ímóti føroysku “grundlógini” at liva sum samkyndur?
2. Er løgmaður samdur í útsøgnini hjá landsstýrismanninum í uttanríkis- og mentamálum?
3. Um nei, ætlar løgmaður, at hetta fær nakrar avleiðingar fyri landsstýrismannin í uttanríkis- og
mentamálum?
Svar:
Til spurning 1-3
Tá formaður Miðfloksins sigur grundlóg, so gangi eg út frá at hann meinar tað óskrivaða
virðisgrundarlagið hjá føroyska fólkinum, soleiðis sum hann sjálvur tulkar tað at verða. Eg haldi tað vera
rættiliga nasadjarvt av formanni Miðfloksins at gera niðurstøður um virðisgrundarlagið hjá øllum Føroya
fólki, útfrá sínari egnu sannføring.
Lat meg sláa fast, at eg á ongan hátt eri samdur í teimum útsagnunum, sum formaðurin í Miðflokkinum
førdi fram í valsendingini hjá Miðflokkinum, og taki fulla frástøðu frá teimum.
Somuleiðis havi eg gjørt formanninum í Miðflokkinum greitt, at útsagnirnar á ongan hátt umboða Føroyar
og føroyingar, og havi átalað hann fyri hetta.
Í Tinganesi, 7. november 2022
Bárður á Steig Nielsen
løgmaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Aksel V. Johannesen, løgtingsmaður
Svarari: Bárður á Steig Nielsen, løgmaður
Evni: Samkynd og Føroya «grundlóg»
Spurningar:
1. Er tað rætt, sum landsstýrismaðurin í uttanríkis- og mentamálum, Jenis av Rana,
sigur, at tað stríðir ímóti føroysku “grundlógini” at liva sum samkyndur?
2. Er løgmaður samdur í útsøgnini hjá landsstýrismanninum í uttanríkis- og
mentamálum?
3. Um nei, ætlar løgmaður, at hetta fær nakrar avleiðingar fyri landsstýrismannin
í uttanríkis- og mentamálum?
Viðmerkingar:
Okkara landsstýrismaður í uttanríkis- og mentamálum segði hesi orðini í Andglettinum
í Kringvarpinum í gjár:
«Tað at liva sum sokallaður homosexuellur, tað er í stríð ímóti tí grundlóg, sum eg
persónliga havi, og sum Miðflokkurin hevur, og sum eg eisini haldi, at Føroyar hava»
Løgmaður hevur evstu ábyrgd av førda politikkinum hjá landsstýrinum. Tað er eisini
løgmaður, sum hevur ábyrgd av, at landsstýrisfólk umboða Føroyar á virðiligan hátt.
Um tey ikki gera tað, hevur løgmaður fullan rætt og heimild at taka avgerð um, at hetta
fær avleiðingar fyri landsstýrisfólk.
Ein landsstýrismaður í uttanríkismálum er andlitið úteftir hjá landsstýrinum, og tí
myndar hann serliga stóran part av landsstýrinum.
Tí verða hesir fyrispurningarnir sett.
Á Løgtingi, 26. oktober 2022
Aksel V. Johannesen

-- 1 of 1 --