52-042/2022

ALMANNAMÁLARÁÐIÐ
Eirargarður 2 • FO-100 Tórshavn
Tel: +298 304000 • Fax: +298 304045 • E-mail: amr@amr.fo
Løgtingið
Tinghúsvegur 1-3
110 Tórshavn
5. oktober 2022
Mál: 22/17522
Viðgjørt: Maria Michelsen
Nr. 52-042/2022
Fyrispurningur eftir tingskipanini § 52 a
Fyrispurningur um støðuna á Familjudeplinum, settur landsstýrismanninum í
almannamálum, Sólvit E. Nolsø (at svara skrivliga eftir TS § 52 a)
Fyrispurningurin er soljóðandi:
1. Hví er einki virksemi á Familjudeplinum?
2. Hvørjar eru ætlanirnar við hesum tilboðnum í framtíðini?
3. Hvørjar eru ætlanirnar við væl útbúna starvsfólkahópinum?
Viðmerkingar:
Í nógv ár hava barnaverndartænasturnar kring landið havt møguleika at veita familjum eitt
tilboð á Familjudeplinum. Hetta tilboðið hevur havt eitt sera høgt og væl kvalifiserað fakligt
orð á sær og hevur hjálpt og vegleitt nógvum familjum víðari á leið.
Spyrjarin hevur fingið at vita, at einki virksemi er á Familjudeplinum í løtuni, hóast depilin
hevur sera væl útbúgvin starvsfólk.
Á Familjudeplinum kemur ofta fyri, at dugnaligu starvsfólkini finna aðrar og smidligari
loysnir enn, at barnið fer heiman.
Haraftrat eru vit í eini støðu, har barnaverndarøkið fær eitt vaksandi tal av klagum í
frágreiðingum frá Løgtingsins umboðsmanni. Spurningur kann tí setast við, um orsøkin er
ónøgdsemi við stovnstilboðini hjá landinum, og um nakað kann gerast at bøta um hetta.
Tí verður hesin fyrispurningurin settur.
Á Løgtingi, 23. september 2022
Djóni Nolsøe Joensen

-- 1 of 2 --

ALMANNAMÁLARÁÐIÐ
síða 2 av 2
Svar:
Almannaverkið hevur upplýst, at virksemið á familjudeplinum hevur verið sera óstøðugt
seinastu árini. Í 2021 var virksemið á familjudeplinum soleiðis:
- av 84 døgum vóru 2 familjur innskrivaðar
- av 162 døgum var 1 familja innskrivað
- av 119 døgum var eingin familja innskrivað
Høvuðsbarnaverndarnevndin tekur avgerð um at innskriva familjur á familjudepilin eftir
tilmæli frá barnaverndartænastunum kring landið. Talan er tó um eitt sjálvboðið tilboð til
familjuna. Hetta hevur við sær, at familjan ikki nýtist at møta á stovninum kortini og/ella
kann fara av stovninum eftir stutta tíð, hóast avgerðina hjá Høvuðsbarnaverndarnevndini.
Í 2021 vórðu 5 familjur innskrivaðar á familjudepilin, harav tvær familjur fóru av stovninum
aftur aftaná fáar dagar.
Hóast óstøðugt virksemi, skal stovnurin vera fult virkisførur við fullari starvsfólkamanning
árið runt. Hetta hevur ført til ymiskar avbjóðingar við tíðini, bæði í mun til virksemi á
stovninum og starvsfólkahópin.
Almannaverkið hevur roynt at skipa arbeiðið hjá starvsfólkunum soleiðis, at starvsfólkini á
familjudeplinum hava tikið vaktir á samdøgursstovnum fyri børn/ung, tá einki virksemi hevur
verið á familjudeplinum. Hetta hevur tó ikki virka eftir ætlan, tí starvsfólkini skula vera tøk á
familjudeplinum við stuttum skotbrái, tá ein familja verður innskrivað. Tískil skapar hetta ov
nógv órógv í arbeiðinum á samdøgursstovninum fyri børn/ung.
Almannamálaráðið hevur saman við Almannaverkinum sett eina tilgongd í verk í mun til at
fáa greiðu á, hvussu virksemið á familjudeplinum skal skipast framyvir. Henda tilgongdin
fevnir eisini um starvsfólkahópin, sum í verandi løtu eru flutt í onnur størv í
Almannaverkinum.
Tórshavn, 5. oktober 2022
Sólvit E. Nolsø
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Djóni Nolsøe Joensen, løgtingsmaður
Svarari: Sólvit E. Nolsø, landsstýrismaður í almannamálum
Evni: Støðan á Familjudeplinum hjá Almannaverkinum
Spurningar:
1. Hví er einki virksemi á Familjudeplinum?
2. Hvørjar eru ætlanirnar við hesum tilboðnum í framtíðini?
3. Hvørjar eru ætlanirnar við væl útbúna starvsfólkahópinum?
Viðmerkingar:
Í nógv ár hava barnaverndartænasturnar kring landið havt møguleika at veita familjum
eitt tilboð á Familjudeplinum. Hetta tilboðið hevur havt eitt sera høgt og væl
kvalifiserað fakligt orð á sær og hevur hjálpt og vegleitt nógvum familjum víðari á
leið.
Spyrjarin hevur fingið at vita, at einki virksemi er á Familjudeplinum í løtuni, hóast
depilin hevur sera væl útbúgvin starvsfólk.
Á Familjudeplinum kemur ofta fyri, at dugnaligu starvsfólkini finna aðrar og
smidligari loysnir enn, at barnið fer heiman.
Haraftrat eru vit í eini støðu, har barnaverndarøkið fær eitt vaksandi tal av klagum í
frágreiðingum frá Løgtingsins umboðsmanni. Spurningur kann tí setast við, um
orsøkin er ónøgdsemi við stovnstilboðini hjá landinum, og um nakað kann gerast at
bøta um hetta.
Tí verður hesin fyrispurningurin settur.
Á Løgtingi, 23. september 2022
Djóni Nolsøe Joensen

-- 1 of 1 --