52-032/2022

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 26. september 2022
Tygara ref.:
Máltal.: 21/08502-152
Svar
upp á
§ 52a fyrispurning nr. 52-032/2022 frá Jóhannis Joensen, løgtingsmanni, settur Jenis av
Rana, landsstýrismanni, um ábyrgd av serskúlaflutningi.
Fyrispurningurin er soljóðandi:
1. Kann landsstýrismaðurin greiða frá, hvørjar flutningstænastur kommunustýrið skal seta í
verk fyri at lúka kravið í serskúlalógini um at bera kostnaðin av næmingaflutninginum?
2. Hvør myndugleiki skal ávikavist skipa fyri og gjalda fyri næmingaflutning í teimum førum,
har næmingurin hevur so serligan tørv, at næmingurin ikki kann ferðast saman við øðrum,
t.d. við Bygdaleiðum ella aðrari busstænastu?
3. Ætlar landsstýrismaðurin at taka stig til eina meira samhaldsfasta flutningstænastu, har
landið átekur sær næmingaflutningin á serskúlaøkinum?
Svar
Til 1: Tær flutningstænastur, ið kommunustýrið hevur skyldu til at seta í verk sambært
serskúlalógini, eru tær somu, sum skulu setast í verk fyri næmingar, sum ganga í fólkaskúla uttan
fyri teirra egnu bústaðarkommunu, sbrt. § 11, stk. 3 í løgtingslóg nr. 50 frá 9. mai 2005 um
serskúla, sbrt. § 33 í løgtingslóg nr. 125 frá 20. juni 1997 um fólkaskúlan. Hetta merkir millum
annað, at kommunustýrið skal skipa fyri flutningi av næmingum millum heim og (ser)skúla, ella
samsýna næminginum útreiðslur til egnan flutning, tá ið ikki ber til at vísa til almennar
ferðslumiðlar.
Viðvíkjandi júst hvørjum flutningshátti, ið kommunustýrið hevur skyldu til at bjóða næmingi, er
at siga, at hetta í størsta mun veldst um eina ítøkiliga meting av tørvinum hjá einstaka
næminginum, ið kommunustýrið noyðist at gera í hvørjum einstøkum føri, og kann hetta m.a.
fevna um bussar ella hýruvognar, um ongir almennir ferðslumiðlar eru egnaðir.
Til 2: Til ber at staðfesta, at kommunan skal skipa fyri og gjalda fyri flutning, eisini í teimum
førum, har næmingurin ikki kann ferðast við Bygdaleiðum ella aðrari busstænastu.
Til 3: Hesin spurningurin er ikki viðgjørdur enn, men møguleiki er fyri, at hann kann verða tikin
upp í sambandi við endurskoðanina av fólkaskúlalógini í ár.

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo Page 2 of 2
Vinarliga
Jenis av Rana
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Ábyrgd av serskúlaflutningi
Spurningar:
1. Kann landsstýrismaðurin greiða frá, hvørjar flutningstænastur kommunustýrið
skal seta í verk fyri at lúka kravið í serskúlalógini um at bera kostnaðin av
næmingaflutninginum?
2. Hvør myndugleiki skal ávikavist skipa fyri og gjalda fyri næmingaflutning í
teimum førum, har næmingurin hevur so serligan tørv, at næmingurin ikki
kann ferðast saman við øðrum, t.d. við Bygdaleiðum ella aðrari busstænastu?
3. Ætlar landsstýrismaðurin at taka stig til eina meira samhaldsfasta
flutningstænastu, har landið átekur sær næmingaflutningin á serskúlaøkinum?
Viðmerkingar:
Serskúlalógin (ll. nr. 50 frá 9. mai 2005 um serskúla, sum broytt við løgtingslóg nr. 47
frá 6. mai 2016) ásetir í § 11, stk. 3, at kommunustýrið skal bera kostnaðin av
næmingaflutninginum í og úr skúla. Hetta skal sum skilst gerast eftir somu reglum
sum eftir fólkaskúlalógini.
Eftir § 33 í fólkaskúlalógini er yvirskipaða kravið, at kommunustýrið skal skipa fyri
flutningi millum skúlar og heim ella nánd av heiminum av næmingum, sum ganga í
skúla uttan fyri teirra egnu bústaðarkommunu. Lógin ásetir eisini, at hendan
flutningsskyldan kann vera lokin við at vísa næmingunum til almennar ferðslumiðlar
ella við at samsýna teimum útreiðslur til egnan flutning.
Spyrjarin hevur fingið kunnleika til, at hendan skipan kann vera sera óheppin í
einstøkum førum. Dømi eru um, at ein miðalstór kommuna má hava upp í tríggjar
einstaklingafyriskipanir um næmingaflutning. Orsøkin er tann einfalda, at
næmingarnir hvør í sínum lagi hava so mikið serligan tørv, at teir ikki kunnu ferðast
saman við øðrum.
Tað er sjálvandi sera óheppið, um kommunur kenna seg noyddar at skipa fyri slíkum
næmingaflutningi, ið at síggja til liggur væl uttanfyri ta ábyrgd, sum fólkaskúlalógin
áleggur kommununum; men tað verður gjørt, tí eftir øllum at døma er ongin annar
sum tekur um endan, tá ið tey nærmastu ikki hava umstøður ella møguleika at átaka
sær flutningin.

-- 1 of 2 --

Spurningurin er, um tað skal vera uppgávan hjá einari kommunu – og ikki ein
landsuppgáva - at hava einstaklingafyriskipanir, tá ið tað kemur til næmingaflutning.
Spurt verður tí um, hvussu lóggávan skal skiljast á hesum øki og hvørjar ætlanir
landsstýrismaðurin hevur.
Á Løgtingi, 14. september 2022
Jóhannis Joensen

-- 2 of 2 --