52-029/2022

Dagf. 23. september 2022
HMR j. nr. 22/16824-4
Kaj Leo Holm Johannesen
landsstýrismaður
Svar
upp á
fyrispurning nr. 52-029/2021 eftir §52a í tingskipanini um klimaviðgerðartúrar til Kroatia fyri
gikta- og psoriasissjúklingar, frá Edvu Jacobsen, løgtingskvinnu
Spurningarnir vóru soljóðandi:
1. Nú tá eingin sleppur klimaviðgerðartúrar til Kroatia, fáa so øll nøktandi viðgerðartilboð, bæði tey,
sum ikki tola lívfrøðiligan heilivág, og tey, sum lívfrøðiligur heilivágur ikki veitir nóg góða
hjálp?
2. Eru tað gikta- og psoriasissjúklingar, sum kunnu sigast at fáa verri viðgerðartilboð (detta niður
ímillum), nú teir ikki sleppa til klimaviðgerðartúrar?
3. Hví er visitatiónin til hesar klimaviðgerðartúrar hjá Heilsuverki Føroya so nógv broytt, at hesir
sjúklingar ikki sleppa hesar túrar, sum hava verið gjørdir í tøttum samstarvi við Et Bedre Liv í
Danmark?
4. Ætlar landsstýrismaðurin at eftirmeta skipanina við klimaviðgerðartúrum fyri at tryggja, at eingin
dettur niður ímillum, grundað á eitt avtikið tilboð?
5. Ætlar landsstýrismaðurin at fáa formliga avtalu við klimaviðgerðardepilin í Kroatia ella við annan
viðgerðarstovn uttanlands, soleiðis at viðgerð verður tryggjað fyri hesar sjúklingar?
Svar:
Til spurning 1 og 2
Sambært Sjúkrahúsverkinum verður nøktandi viðgerð givin til allar sjúklingar. Teir sjúklingarnir, sum
ikki tola medisinska viðgerð, fáa framvegis tilboð um klimaviðgerð. Klimaviðgerðin er sostatt ikki
avtikin sambært Sjúkrahúsverkinum.

-- 1 of 2 --

Til spurning 3
Sambært Sjúkrahúsverkinum er mannagongdin at senda sjúklingar til klimaviðgerð broytt soleiðis, at
umsóknir um viðgerð uttanlands til viðgerðarstøð, ið Sjúkrahúsverkið ikki hevur avtalu við, verða
viðgjørdar í visitatiónsnevndini. Hetta merkir, at serlæknin innan økið, í hesum føri serlæknafrøði innan
giktasjúkur og serlæknafrøði innan húðsjúkur, sendir umsóknir til visitatiónsnevndina. Her verður støða
tikin til, um tað er grundarlag fyri, at viðgerðin verður játtað. Orsøkin til broytingina er sambært
Sjúkrahúsverkinum, at allir sjúklingabólkar í Sjúkrahúsverkinum skulu fylgja somu
visitasjónsmannagongd, í samsvar við galdandi lóggávu.
Tað er framvegis galdandi, at í mesta lagi 20 fólk kunnu verða send avstað. Hetta er tengt at, um
serlæknafrøðin innan økið, giktalækni/serlækni innan húðsjúkur, meta, at tað er heilsufakligur tørvur á tí,
og um visitatiónsnevndin endaliga játtar hesum.
Til spurning 4 og 5
Landsstýrismaðurin hevur í vikuni havt fund við nevndina í Giktafelag Føroya um klimaviðgerð. Tey
meta ikki, at tær broyttu mannagongdirnar eru nøktandi og meta, at fleiri giktasjúklingar detta niður
ímillum og fáa ikki eina nøktandi viðgerð.
Landsstýrismaðurin hevur tikið málið um tær broyttu mannagongdirnar í sambandi við klimaviðgerð upp
við sjúkrahúsleiðsluna. Landsstýrismaðurin er kunnaður av sjúkrahúsleiðsluni um, at klimaviðgerðin ikki
er avtikin, og at tað framhaldandi kunnu í mesta lagi 20 fólk sendast avstað um árið til klimaviðgerð, um
tað er heilsufakligt grundarlag fyri tí. Landsstýrismaðurin roknar tí við, at viðgerðin framhaldandi verður
nøktandi, og at tað verður tryggjað, at tey, sum til dømis ikki tola medisinska viðgerð, framhaldandi fáa
bjóðað eitt nøktandi tilboð, sum til dømis klimaviðgerð.
Heilsumálaráðið, 23. september 2022
Kaj Leo Holm Johannesen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Edva Jacobsen, løgtingsmaður
Svarari: Kaj Leo Holm Johannesen, landsstýrismaður í heilsumálum
Evni: Klimaviðgerðartúrar til Kroatia fyri gikta- og psoriasissjúklingar
Spurningar:
1. Nú tá eingin sleppur klimaviðgerðartúrar til Kroatia, fáa so øll nøktandi
viðgerðartilboð, bæði tey, sum ikki tola lívfrøðiligan heilivág, og tey, sum
lívfrøðiligur heilivágur ikki veitir nóg góða hjálp?
2. Eru tað gikta- og psoriasissjúklingar, sum kunnu sigast at fáa verri viðgerðartilboð
(detta niður ímillum), nú teir ikki sleppa til klimaviðgerðartúrar?
3. Hví er visitatiónin til hesar klimaviðgerðartúrar hjá Heilsuverki Føroya so nógv
broytt, at hesir sjúklingar ikki sleppa hesar túrar, sum hava verið gjørdir í tøttum
samstarvi við Et Bedre Liv í Danmark?
4. Ætlar landsstýrismaðurin at eftirmeta skipanina við klimaviðgerðartúrum fyri at
tryggja, at eingin dettur niður ímillum, grundað á eitt avtikið tilboð?
5. Ætlar landsstýrismaðurin at fáa formliga avtalu við klimaviðgerðardepilin í
Kroatia ella við annan viðgerðarstovn uttanlands, soleiðis at viðgerð verður
tryggjað fyri hesar sjúklingar?
Viðmerkingar:
Heilsuverk Føroya hevur í umleið 20 ár bjóðað fólki við gikt og psoriasis ein
klimaviðgerðartúr, fyrstu árini til Íslands fyri sjúklingar við psoriasis, og seinnu
mongu árini til Kroatia fyri bæði psoriasis- og giktasjúklingar.
Tað eru fleiri, sum ikki tola lívfrøðiligan heilivág ella sum ikki fáa nokk av hjálp við
hesum heilivági. Fyri tey hevur klimaviðgerðartúrurin verið alt avgerandi sum
viðgerðartilboð. Tó skal sigast, at fyri nógv er lívfrøðiligur heilivágur góður, og hesin
heilivágur er við til at geva nógvum fólkum eina góða lívsgóðsku, og tað er at fegnast
um. Tað virkar bara ikki sum viðgerð hjá øllum.
Tá sjúka rakar er sera týdningarmikið, at tryggleiki viðvíkjandi viðgerð er til staðar.
Tað er krevjandi alla tíðina at skula brúka orku uppá at søkja og kanna uttan at vita,
um møguleikin fyri viðgerðartilboðum er til staðar longur. Tí verður hesin spurningur
settur.
Á Løgtingi, 13. september 2022
Edva Jacobsen

-- 1 of 1 --