52-014/2022

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 2. septembur 2021
J. nr.: 21/12802
Viðgjørt: AE
Svar til fyrispurning nr. 52-014/2022 frá Páll á Reynatúgvu, løgtingsmanni, settur Una
Rasmussen, landsstýrismanni í fíggjarmálum, um Sandoyartunnilin og ferðaætlan hjá
Bygdaleiðum í Sandoynna
Fyrispurningurin er soljóðandi:
1. Hvussu gongst við arbeiðinum at gera Sandoyartunnilin lidnan, og nær letur hann upp
fyri almennari ferðslu?
2. Hvør verður kostnaðurin fyri at koyra gjøgnum tunnilin við ávikavist persónbili,
vøruvogni, lastbili og bussi?
3. Hvussu verða Bygdaleiðir skipaðar millum Havnina og bygdirnar í Sandoynni/Skúvoy?
4. Hvør verður kostnaðurin at koyra við Bygdaleiðum millum Havnina og bygdirnar í
Sandoynni/Skúvoy?
5. Hvussu verður farleiðin út í Hest skipað, eftir at Teistin gevst at sigla í Sandoynna?
6. Hevur landsstýrið ætlanir at skipa suðuroyarleiðina um Sandoynna, meðan
Suðuroyartunnilin verður gjørdur?
Svar til spurning 1
Arbeiðið við Sandoyatunlinum gongur sum ætlað. Sáttmálin við arbeiðstakaran sigur, at arbeiðið
at gera tunnilin skal verða liðugt 2. desembur 2023.
Tað, sum er eftir at gera, er í høvuðsheitum at vatntryggja tunnilin, at stoypa tveir pumpubrunnar,
nøkur tøknihús og portalin í Traðardali. At gera vegin uttanfyri tunnilin, el-arbeiði, seta pumpur
upp, og at enda at leggja seinasta laðið av asfalti á vegabreytina og at merkja upp.
Svar til spurning 2
Nevndin í P/F Eystur- og Sandoyartunlar hevur ikki viðgjørt spurningin um, hvat tað skal kosta
at koyra gjøgnum Sandoyartunnilin. Ætlandi verður spurningurin tikin upp í heyst ella í vetur.
Svar til spurning 3
Strandferðslan fyrireikar ferðasambandið hjá Bygdaleiðum til og úr Sandoynni/Skúvoy, sum
verður umvegis undirsjóvartunnilin.
Umframt at umskipa koyringina, soleiðis at nýggja ferðasambandið gjøgnum tunnilin verður
gagnnýtt, er ætlanin at knýta busssambandið til og úr Sandoynni tættari at øðrum leiðum, sum
eru knýttar at restini av landinum, umvegis høvuðsstaðarøkið. Tænastan og framkomuleikin
verður enn betri. Eitt endaligt uppskot til ferðaætlan fyriliggur 1. februar 2023.

-- 1 of 2 --

F Í G G J A R M Á L A R Á Ð I Ð
Ministry of Finance
2/2
Svar til spurning 4
Tað er ikki ásettur nakar endaligur kostnaður fyri dagførda busssambandið, ið fer at vera millum
Sandoynna og meginøkið.
Svar til spurning 5
Landsstýrismaðurin vil virka fyri, at tá ið Sandoyartunnilin letur upp fyri ferðslu, so er ein
hóskandi loysn funnin á Hestleiðini.
Teistin er í størra lagi og sera dýrur í rakstri í mun til møguligt ferðafólkatal millum Gomlurætt
og Hest, tá ið siglingin til Sandoynna steðgar. Strandferðslan hevur víst á, at tørvur er á einum
minni skipi á leiðini.
Strandferðslan hevur samskift við fólk við tilknýti til Hestoynna, um at koma við einum tilmæli
um, hvussu ferðasambandið kann skipast í framtíðini. Eitt uppskot er komið, og verður hetta
tikið við í víðari tilgongdini at fyrireika framtíðar ferðasamband út í oynna.
Strandferðslan bíðar eisini eftir einum áliti frá Tórshavnar kommunu um ætlanirnar hjá
kommununi viðvíkjandi leiðini út í Hest.
Samanumtikið verður Ferðaætlanin millum Gomlurætt – Hest løgd eftir tí tørvi sum verður á
leiðini, í samskifti við fastbúgvandi í Hesti, og helst í samstarvi við Tórshavnar kommunu, sum
hevur ábyrdina av havnaviðurskiftunum í Hesti.
Svar til spurning 6
Spurningurin um at skipa Suðuroyarleiðina um Sandoynna er áhugaverdur. Arbeitt verður tó bert
við málinum um at betra ferjusambandið millum Tórshavn og Suðuroy, meðan
Suðuroyartunnilin verður fyrireikaður og gjørdur.
Tinganes, 2. septembur 2022
Uni Rasmussen
landsstýrismaður í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Páll á Reynatúgvu, løgtingsmaður
Svarari: Uni Rasmussen, landsstýrismaður í fíggjarmálum
Evni: Sandoyartunnilin og ferðaætlanin hjá Bygdaleiðum í Sandoynna
Spurningar:
1. Hvussu gongst við arbeiðinum at gera Sandoyartunnilin lidnan, og nær letur
hann upp fyri almennari ferðslu?
2. Hvør verður kostnaðurin fyri at koyra gjøgnum tunnilin við ávikavist
persónbili, vøruvogni, lastbili og bussi?
3. Hvussu verða Bygdaleiðir skipaðar millum Havnina og bygdirnar í
Sandoynni/Skúvoy?
4. Hvør verður kostnaðurin at koyra við Bygdaleiðum millum Havnina og
bygdirnar í Sandoynni/Skúvoy?
5. Hvussu verður farleiðin út í Hest skipað, eftir at Teistin gevst at sigla í
Sandoynna?
6. Hevur landsstýrið ætlanir at skipa suðuroyarleiðina um Sandoynna, meðan
Suðuroyartunnilin verður gjørdur?
Viðmerkingar:
Gleðin um komandi Sandoyartunnilin er ovurhonds stór í Sandoynni, nú dagurin
nærkast har koyrandi verður millum Streymoynna og Sandoynna.
Kunningin frá tunnilsfelagnum var jøvn og góð, meðan borað varð, men síðani síðsta
skotið, hevur ikki verið nevnivert at frætt hvussu gongst við arbeiðinum.
Vísandi til ovurstóra áhugan í Sandoynni, og aðrastaðni í landinum við, verða hesir
spurningar settir landsstýrismanninum.
Á Løgtingi, 19. august 2022
Páll á Reynatúgvu

-- 1 of 1 --