52-013/2022

Dagf. 30. august 2022
HMR j. nr. 22/14924-5
Kaj Leo Holm Johannesen
landsstýrismaður
Svar
upp á
Fyrispurning nr. 52-013/2022 eftir § 52 a í tingskipanini um dialysuviðgerð í Suðuroynni, frá
Bjarna Hammer, løgtingsmanni
Spurningarnir vóru soljóðandi:
1. Kann landsstýrismaðurin upplýsa, nær tað verður møguligt at fáa dialysuviðgerð í
Suðuroynni?
2. Heldur landsstýrismaðurin tað verða nøktandi, at suðuroyingar saman við familju síni verða
noyddir at flyta av oynni, frá húsi og heimi, tí Heilsumálaráðið ikki megnaði at halda orð?
Svar:
Til spurning 1
Á fíggjarlógini fyri í ár eru játtaðar 1 mió. kr. til Suðuroyar sjúkrahús til dialysuviðgerð.
So skjótt sum peningur varð játtaður til endamálið, fór Sjúkrahúsverkið í gongd við at kanna hvørjir
møguleikar vóru, og hvussu dialysuviðgerð verður skipað í londunum kring okkum. Ísland og
Danmark hava verið nýtt sum kanningarøki, tí hetta eru tey lond, vit meta vera tey, sum líkjast
Føroyum og umstøðunum í Føroyum mest. Harafturat eru hetta lond, sum nýta somu tól, sum tey, ið
verða nýtt á Landssjúkrahúsinum.
Eitt uppskot til loysn av dialysuviðgerð á Suðuroyar sjúkrahúsi varð liðugt í síðstu viku, og verður
viðgjørt av sjúkrahúsleiðsluni í løtuni.
Sum landsstýrismaðurin áður hevur boðað frá, so verður serlæknakapasiteturin í nýrasjúkum seinni
í ár tvífaldaður, tá ein serlækni í nýrasjúkum væntandi verður settur afturat verandi serlækna á
Landssjúkrahúsinum. Sambært Sjúkrahúsverkinum fer hetta at lætta um arbeiðsbyrðuna hjá
einsamalla nýralæknanum, soleiðis at dialysuviðgerð kann gerast veruleiki á Suðuroyar sjúkrahúsi.

-- 1 of 2 --

Áðurnevnda játtan til Suðuroyar sjúkrahús uppá 1 mió. kr verður, nú omanfyrinevndu kanningar eru
lidnar, brúkt til at keypa útgerð fyri. Henda útgerð kemur á Suðuroyar sjúkrahús í ár.
Um alt gongur sum ætlað, kann farast undir at geva dialysuviðgerð á Suðuroyar sjúkrahúsi í
komandi ári.
Til spurning 2
Landsstýrismaðurin metir, at tað er óheppið, tá ið tað verður mett neyðugt hjá sjúklingum at flyta
bústað vegna teirra sjúkustøðu, men gongur sum ætlað, kann dialysuviðgerð bjóðast á Suðuroyar
sjúkrahúsi í komandi ári.
Heilsumálaráðið, 30. august 2022
Kaj Leo Holm Johannesen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Bjarni Hammer, løgtingsmaður
Svarari: Kaj Leo Holm Johannesen landsstýrismaður í heilsumálum
Evni: Dialysuviðgerð í Suðuroynni
Spurningar:
1. Kann landsstýrismaðurin upplýsa, nær tað verður møguligt at fáa
dialysuviðgerð í Suðuroynni?
2. Heldur landsstýrismaðurin tað verða nøktandi, at suðuroyingar saman við
familju síni verða noyddir at flyta av oynni, frá húsi og heimi, tí
Heilsumálaráðið ikki megnaði at halda orð?
Viðmerkingar:
Tað er nú meiri enn ein mánaði síðani, at landsstýrismaðurin í heilsumálum segði seg
at hava mist tolið við, at eingin loysn enn var funnin á dialysuviðgerðini í Suðuroynni.
Sjúkrahúsverkið fekk tá greið boð um, at NÚ skuldi ein loysn finnast.
12. juli gav landsstýrismaðurin í heilsumálum leiðsluni á Sjúkrahúsverki Føroya greið
boð um beinanvegin at finna eina loysn fyri dialysusjúklingar í Suðuroynni.
Tað vísir seg tó, at leiðslan á Sjúkrahúsverki Føroya leggur líka í, hvat
landsstýrismaðurin sigur. Í øllum førum er onki hent uttan tað, at dialysusjúklingar eru
noyddir at flyta av oynni, frá húsi og heimi. Umframt herviligu sjúkuna blívur
fíggjarliga byrðan av hesum bara enn tyngri, tí nú fáa sjúklingarnir m.a. dupult
húsarhald aftur at at stríðast við.
Komandi leygardag verður ferðasambandið til og frá Suðuroynni munandi skert, og í
skrivandi løtu kann staðfestast, at ætlanin hjá landsstýrismanninum at hjálpa
dialysusjúklingum í Suðuroynni ikki er framd í verki.
Fyri at fáa greiðu á, hvussu gongst við hesum týdningarmikla máli, verður hesin
fyrispurningur settur.
Á Løgtingi, 18. august 2022
Bjarni Hammer

-- 1 of 1 --