52-213/2021

U M H V Ø R V I S - O G V I N N U M Á L A R Á Ð I Ð
GONGIN 7 • POSTSMOGA 377 • 110 TÓRSHAVN • TELEFON 30 66 00 • E-MAIL: UVMR@UVMR.FO
Løgtingið
Tinghúsvegur 1-3
Postboks 208
110 Tórshavn
Føroyar
Tórshavn, tann 20. juni 2022
J.nr.: 22/11849-3
At tilskila í svari
Svar upp á § 52a-fyrispurning nr. 52-213/2021 frá Helga Abrahamsen, løgtingsmanni, um
eftirlit við festum
Spurningarnir vóru soljóðandi:
1. Hevur Búnaðarstovan gjørt nakra ætlan fyri, hvussu reglulig sýn kunnu verða gjørd av
festum?
2. Hvussu nógv festisýn hevur Búnaðarstovan gjørt seinastu tvey árini?
Svar:
Í svari til § 52a-fyrispurning nr. 52-92/2019, sum spyrjarin eisini vísir til, varð greitt frá, at
festisýnini vóru slept, tá ið farið varð undir at einskilja ta almennu jørðina fyri nøkrum árum
síðani. Orsøkin til hetta var ivaleyst, at festisýn eru óneyðug, um jørðin er einskild.
Einskiljingar-tilgongdin varð síðani steðgað, men lógarverkið, sum varð samtykt í sambandi
við ta komandi einskiljingina, varð ikki broytt aftur til ta veruligu støðu, sum enn er galdandi,
nevniliga at jørðin framvegis er almenn ogn.
Undanfarni landsstýrismaður tók tí stig til at fáa gongd aftur á regluligu festisýnini, sum vóru
dottin niðurfyri.
Búnaðarstovan setti í mai 2021 fólk at taka sær av uppgávuni, og Búnaðarstovan hevur síðani
framt 21 festisýn, serliga í sambandi við festaraskifti. Harumframt hevur Búnaðarstovan sýnað
festi, sum kært er um, og leigutraðir. Arbeitt verður við at fáa festisýnini í eina meira skipaða
legu soleiðis, at øll festi verða sýnað við regluligum millumbili.
Umhvørvis- og vinnumálaráðið, 20. juni 2022
Magnus Rasmussen
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Helgi Abrahamsen, løgtingsmaður
Svarari: Magnus Rasmussen, landsstýrismaður í umhvørvis- og vinnumálum
Evni: Eftirlit við festum
Spurningar:
1. Hevur Búnaðarstovan gjørt nakra ætlan fyri, hvussu reglulig sýn kunnu verða gjørd av
festum?
2. Hvussu nógv festisýn hevur Búnaðarstovan gjørt seinastu tvey árini?
Viðmerkingar:
Fyri tveimum árum síðani setti Heðin Mortensen, sum tá var løgtingsmaður, undirritaða, sum tá var
landsstýrismaður, ein § 52a fyrispurning, nr. 92/2019, har spurt varð, um nøkur skylda ella ábyrgd
er hjá Búnaðarstovuni at hava eftirlit við ella vitja festi til tess at tryggja, at festibrævið er dagført.
Í svarinum til fyrispurningin varð millum annað sagt: “Búnaðarstovan hevur sambært lóg um
landsjørð skyldu til at hava eftirlit við almennu festunum, ikki bara tá ið festaraskifti er. Hetta
eftirlit hevur ikki virkað nóg væl seinastu árini, men stig eru tikin til at fáa hesi viðurskifti í rættlag,
og Búnaðarstovan er biðin um at fyrireika eina ætlan soleiðis, at festisýn frameftir verða framd
regluliga.”
Nú tvey ár eru liðin, síðani nevndi spurningur varð svaraður verður spurt, um gongd er í málinum.
Á Løgtingi tann 16. juni 2022
Helgi Abrahamsen

-- 1 of 1 --