52-212/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 30. juni 2022
J. nr.: 22/11813
Viðgjørt: AE
Svar til fyrispurning nr. 52-212/2021 frá Bjarna Hammer, løgtingsmanni, settur
landsstýrismanninum í fíggjarmálum, Una Rasmussen, um Herjólf sum avloysaraskip hjá
Smyrli
Fyrispurningurin er soljóðandi:
1. Hvussu verður ferðaætlanin við nýggja avloysaraskipinum á suðuroyarleiðini?
2. Hvussu leingi tekur tað at sigla til meginøkið og aftur?
3. Hvussu stór alda ella harður streymur skal vera, áðrenn túrar verða avlýstir?
4. Hevur Herjólfur stabilisatorar?
5. Hvussu skal ítrótturin skipa seg hesa tíðina?
6. Hvussu skulu pendlarar skipa seg?
7. Hvussu skulu arbeiðsplássini skipa seg?
8. Hvussu skal vinnan fáa somu nøgd av farmi til og av oynni hesa tíðina?
Svar til spurning nr. 1 og 2
Eftir føstu ferðaætlanini siglir Smyril 36 ferðir um Suðuroyarfjørð um vikuna, tað vil siga 18
ferðir aftur og fram um vikuna. Tá avloysaraskip eru fyri Smyril, verður vanliga siglt færri túrar.
Strandferðslan arbeiðir við at leggja ferðaætlanina, og hon verður løgd eftir, at tað tekur 2 tímar
og 45 minuttir at sigla. Herjólfur fer í øllum førum at sigla 4 túrar um dagin, ella 28 túrar um
Suðuroyarfjørð um vikuna.
Strandferðslan kannar í løtuni um tað ber til at sigla fleiri túrar um vikuna og hvussu tað skal
skipast. Hetta fyri, at møguleiki eisini skal verða at flyta farm í tíðarskeiðnum. Fleiri viðurskifti
skulu fáast uppá pláss, til dømis um manningar, tilbúgving, vaktarhald og játtan. Sáttmálar og
ásetingar skulu haldast. Hetta kann økja túratalið um Suðuroyarfjørð til millum 34-42 og siglir
Herjólfur 42 túrar um vikuna, so siglir hann alla tíðina og har ein part av tíðini er sett av til
farmaflutning.
Svar til spurning nr. 3
Trygdin hjá ferðafólki og manning verður sett fremst, og siglt verður bara tá tað er ráðiligt at
sigla. Allar trygdarfyriskipanir verða hildnar. Viðmerkjast skal, at tað er sera sjálvdan, at ferðir
verða útsettar ella avlýstar vegna veður. Tær avlýsingar sum eru, eru meginpartin á hávetri.
Um vit samanbera Herjólf og Smyril, so kann Herjólfur sambært Strandferðsluni, sigla í somu
veðurlíkindum sum Smyril.

-- 1 of 2 --

F Í G G J A R M Á L A R Á Ð I Ð
Ministry of Finance
2/2
Svar til spurning 4
Herjólfur hevur stabilisatorar.
Svar til spurning 5, 6 og 7
Ítrótturin, penlarar og arbeiðspláss mugu skipa seg eftir umstøðunum, meðan Herjólfur siglur.
Umstøðurnar til bilaflutning og farmaflutning verða nógv skerdar, meðan Smyril er í dokk.
Smyril tekur 200 bilar, ella 30 trailarar og sleip, meðan Herjólfur tekur 67 bilar, ella 18 trailarar
og sleip.
Verður hugt eftir ferðafólkahagtølum frá undanfarnu árum, so verður tað í allar flestu førum
soleiðis, at øll ferðafólk sleppa við Herjólfi, og at eingin fer at standa eftir á kajini.
Herjólfur fer at hava eina bókingarskipan, sum merkir, at neyðugt er at bóka ávísan túr fyri at
tryggja sær at fáa bilin við, tá ið Herjólfur skal avloysa Smyril.
Svar til spurning 8
Strandferðslan arbeiðir í løtuni við at kanna hvussu farmaflutningur við Herjólfi av vørum innan
fiskaframleiðslu og ídnaðarframleiðslu kann vera skipaður, meðan Smyril er í dokk.
Tinganes, 30. juni 2022.
Uni Rasmussen
Landsstýrismaður í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Bjarni Hammer, løgtingsmaður
Svarari: Uni Rasmussen, landsstýrismaður í fíggjarmálum
Evni: Herjólfur sum avloysaraskip hjá Smyrli
Spurningar:
1. Hvussu verður ferðaætlanin við nýggja avloysaraskipinum á suðuroyarleiðini?
2. Hvussu leingi tekur tað at sigla til meginøkið og aftur?
3. Hvussu stór alda ella harður streymur skal vera, áðrenn túrar verða avlýstir?
4. Hevur Herjólfur stabilisatorar?
5. Hvussu skal ítrótturin skipa seg hesa tíðina?
6. Hvussu skulu pendlarar skipa seg?
7. Hvussu skulu arbeiðsplássini skipa seg?
8. Hvussu skal vinnan fáa somu nøgd av farmi til og av oynni hesa tíðina?
Viðmerkingar:
Tá Smyril skal í dokk, verður hann væntandi burtur í 7-8 vikur hesaferð. Tað er greitt,
at avloysaraskipið – Herjólfur III – hevur pláss fyri 530 fólkum, meðan Smyril hevur
pláss fyri 975 ferðafólkum.
Herjólfur er 70,5 metrar til longdar. Til samanbering var gamli Smyril (Mols) 92,66
metrar. Altso, Herjólfur er 22,1 metrar styttri enn “gamli” Smyril og 67,5 metrar
styttri enn verandi Smyril.
Hesa vikuna hevur virkandi stjórin á Strandferðsluni sagt við útvarpið - smáar tveir
mánaðir, áðrenn Smyril skal í dokk - at arbeiðsplássini í Suðuroynni sjálvi mugu finna
út av fraktini.
Tað fer at ávirka ítrótt, pendlarar, arbeiðspláss og framleiðslu í Suðuroynni, at
Herjólfur tekur færri ferðafólk og umstøðurnar til bilaflutning og farmaflutning verða
nógv skerdar.
Fyri at fáa greiðu á, hvussu landsstýrismaðurin ætlar at loysa hendan trupulleikan,
verður hesin fyrispurningur settur.
Á Løgtingi, 16. juni 2022
Bjarni Hammer

-- 1 of 1 --