52-211/2021

ALMANNAMÁLARÁÐIÐ
Eirargarður 2 • FO-100 Tórshavn
Tel: +298 304000 • E-mail: amr@amr.fo
Løgtingið
Tinghúsvegur 1-3
110 Tórshavn
24. juni 2022
Mál: 22/11589
Tygara Skriv:
Viðgjørt: Barbara Álvsdóttir
Thomsen
Nr. 52/211-2021
Svar upp á § 52 a fyrispurning nr. 52/211-2021 frá Eyðgunn Samuelsen, løgtingsmanni,
settur landsstýrismanninum í almannamálum Sólvit E. Nolsø, um frítíðartilboð til børn
við serligum tørvi
Fyrispurningurin ljóðar soleiðis:
1. Hvussu nógv børn í skúlaaldri frá 3. flokki standa á bíðilista til frítíðartilboð eftir
skúlatíð?
2. Hvussu er bíðilistin býttur yvir landið?
3. Hvussu nógv fleiri børn hava tørv á frítíðartilboði til komandi skúlaár?
4. Er nøkur ítøkilig ætlan um at útvega hesum børnum frítíðartilboð frá komandi
skúlaári?
Svar:
Til nr. 1 og 2
Sambært upplýsingum frá Almannaverkinum stóðu í alt 31 børn á bíðilista til eitt
frítíðartilboð tann 31. mai 2022.
Av hesum 31 børnunum hava fýra fingið bjóðað frítíðartilboð nú eftir summarfrítíðina.
Bíðilistin er býttur soleiðis yvir landið: í Suðurstreymoy standa 13 børn á bíðilista, í
Norðurstreymoy 4 børn, í Vágum 3 børn, í Norðoyggjum 1 barn og í Eysturoynni 10 børn.
Til nr. 3
Í løtuni viðger Almannaverkið 10 umsóknir um frítíðartilboð til børn. Aftrat hesum hevur
Almannaverkið samband við uml. 3-4 børn, sum kunnu hugsast at hava tørv á frítíðartilboði
eftir summarfrítíðina. Royndirnar hjá Almannaverkinum vísa harnæst, at Almannaverkið eftir
skúlabyrjan eisini fær tvær til tríggjar umsóknir um frítíðartilboð innan hendan málbólk.
Eydnast ikki at útvega fleiri pláss til frítíðartilboð næstu tíðina koma sostatt uml. 40 børn at
standa á bíðilista til frítíðartilboð, tá komið er út í september.

-- 1 of 2 --

ALMANNAMÁLARÁÐIÐ
síða 2 av 2
Til nr. 4
Arbeitt verður støðugt við at útvega hóskandi hølir og starvsfólk fyri at gera tað møguligt at
veita børnunum á bíðilista neyðuga tænastu.
Almannaverkið er av teirri fatan, at nógv børn við serligum tørvi høvdu havt størri gagn av
einum heildartilboði heldur enn at hava fleiri ymisk tilboð.
Ítøkiliga kann nevnast, at avtala nýliga er gjørd við Mentamálaráðið og Skúlan á Trøðni um,
at nøkur av teimum børnunum, sum ganga á hesum serskúlatilboðnum og fara í 3. flokk eftir
summarfrítíðina, kunnu fáa frítíðartilboðið veitt á skúlanum eftir skúlatíð. Í løtuni fevnir
avtalan bert um 2 børn.
Somuleiðis verður arbeitt við at gera seravtalur við tær kommunur, sum hava frítíðartilboð til
børn frá 3. flokki. Endamálið er, at tey børn, sum hóast serliga tørvin kunnu megna at ganga í
kommunala frítíðartilboðnum við eyka normering, fáa hóskandi tilboð. Almannaverkið hevur
eina slíka seravtalu og arbeiðir í løtuni við at fáa eina slíka avtalu afturat við aðra kommunu.
Almannamálaráðið 24. juni 2022
Sólvit E. Nolsø
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingsmaður
Svarari: Sólvit E. Nolsø, landsstýrismaður í almannamálum
Evni: Frítíðartilboð til børn við serligum tørvi
Spurningar:
1. Hvussu nógv børn í skúlaaldri frá 3. flokki standa á bíðilista til frítíðartilboð eftir
skúlatíð?
2. Hvussu er bíðilistin býttur yvir landið?
3. Hvussu nógv fleiri børn hava tørv á frítíðartilboði til komandi skúlaár?
4. Er nøkur ítøkilig ætlan um at útvega hesum børnum frítíðartilboð frá komandi skúlaári?
Viðmerkingar :
Um hesa tíðina í fjør var frammi í fjølmiðlunum, at fleiri børn við serligum tørvi ikki fóru at fáa
frítíðartilboð eftir skúlatíð við skúlaársbyrjan 2021.
Skipanin er soleiðis, at kommunurnar útvega øllum børnum frítíðartilboð eftir skúlatíð í 1. og 2.
flokki. Tá ið eitt barn við serligum tørvi byrjar í 3. flokki, skal Almannaverkið taka yvir og útvega
barninum frítíðartilboð.
Manglandi frítíðartilboð rakar familjuna og barnið sera hart. Tað gongur út yvir trivnaðin hjá
barninum, tí barnið verður isolerað heima og fær ikki møguleikan at vera saman við øðrum
javnlíkum.
Fyri foreldrini merkir tað ein fíggjarligan miss og ótryggleika í starvinum, tí tey noyðast úr arbeiði
fyri at vera heima hjá barninum.
Endamálið við lógini um almannatrygd og tænastur er, at foreldur við barni, ið hevur serligan tørv,
fáa møguleika at liva eitt vanligt og virkið lív og luttaka á arbeiðsmarknaðinum á jøvnum føti við
onnur. Harumframt skulu børnini fáa somu tilboð sum onnur børn og harvið møguleikar at mennast
í felagsskapi við onnur børn.
Útveganin av frítíðartilboði til børnini er harumframt ein stór sparing fyri Almannaverkið, tí
foreldrini kunnu halda fram at arbeiða heldur enn at fáa útgoldið pening orsakað av inntøkumissi.
Eisini kunnu manglandi tilboð hava við sær, at hesi foreldur ikki orka meir, og barnið tískil má á
stovn. Eitt stovnspláss, har barnið er alt samdøgrið, er sera dýrt og óneyðugt, um tilboð so sum
frítíðartilboð og umlætting eru tøk til foreldrini, tá ið tørvur er á tí.

-- 1 of 2 --

Fyri at fáa greiðu á, um hetta er nakað, ið landsstýrismaðurin ætlar sær at gera nakað við, verða
hesir spurningar settir.
Á Løgtingi, 14. juni 2022
Eyðgunn Samuelsen

-- 2 of 2 --