52-210/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 20. juni 2022
J. nr.: 22/11485
Viðgjørt: AE
Svar til fyrispurning nr. 52-210/2021 frá Beintu Løwe Jacobsen, løgtingskvinnu, settur
landsstýrismanninum í fíggjarmálum, Una Rasmussen, um asfaltering og annað í Kalsoynni.
Fyrispurningurin er soljóðandi:
1. Nær er ætlanin at asfaltera landsvegirnar og vegirnar í tunlunum í Kalsoynni?
2. Hvørjar ætlanir eru um at bøta um viðurskiftini hjá ferðafólkum, sum bíða á keiini á
Syðradali?
3. Nær er ætlanin at byggja bíðirúm við vesihentleikum og øðrum á keiini á Syðradali?
Svar til spurning 1
Tað eru játtaðar 500 tús. kr. til vegir og tunlar í Kalsoynni í ár (2022). Játtanin er brúkt til at
asfaltera eitt vegastrekki í Villingardalstunlinum. Viðmerkjast kann, at ein partur av
vegakervinum, herímillum tunlar, ongantíð eru gjørdir heilt lidnir. Tað er ein spurningur um játtan,
nær arbeiðið verður gjørt.
Svar til spurning 2 og 3
Landsverk upplýsir, at arbeitt hevur verið við at fyrireika málið um at betra umstøðurnar hjá
ferðafólki við ferjuleguna á Syðradali. Ymiskar loysnir hava verið viðgjørdar, og nakað er brúkt
til planlegging og tekning. Verandi ætlan er at gera eitt bíðirúm við vesi við ferjuleguna á
Syðradali, og tað kostar umleið 2,0 mió. kr.
Tað er umráðandi at umstøðurnar at ferðast eru góðar í Kalsoynni, og landsstýrismaðurin fer at
taka málið upp um at játta pening til endamálið í sambandi við fíggjarlógaruppskotið fyri 2023.
Tinganes, 20. juni 2022
Uni Rasmussen
Landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Beinta Løwe Jacobsen, løgtingsmaður
Svarari: Uni Rasmussen, landsstýrismaður í samferðslumálum
Evni: Asfaltering og annað í Kalsoynni
Spurningar:
1. Nær er ætlanin at asfaltera landsvegirnar og vegirnar í tunlunum í Kalsoynni?
2. Hvørjar ætlanir eru um at bøta um viðurskiftini hjá ferðafólkum, sum bíða á
keiini á Syðradali?
3. Nær er ætlanin at byggja bíðirúm við vesihentleikum og øðrum á keiini á
Syðradali?
Viðmerkingar:
Kalsoyggin er millum mest vitjaðu oyggjar í landinum. Sambært hagtølum hjá SSL
eru omanfyri 20.000 fólk og meira enn 3.000 bilar farin um Kalsoyarfjørð fyrstu fýra
mánaðirnar í ár. Hetta eru fimm túsund ferðafólk fleiri enn somu tíð í fjør. Nógva
ferðslan slítur vegirnar, og tað sæst aftur, tí nógva staðni eru teir illa farnir. Tí mugu
vegirnir asfalterast.
Umstøðurnar hjá ferðafólkum, sum bíða, eru heldur ikki tær bestu, um veðrið er
vánaligt. Løgtingið feldi uppskotið hjá undirritaðu um at bøta um hesi viðurskifti.
Klaksvíkar kommuna hevur sett tvey vesi upp á havnarlagnum, men sambært
fjølmiðlum eru hesi nú tikin burtur, tí tey skuldu brúkast aðrastaðni. Tí má tað
almenna nú gera okkurt fyri at bøta um hesi viðurskifti.
Á Løgtingi, 10. juni 2022
Beinta Løwe Jacobsen

-- 1 of 1 --