52-206/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 16. juni 2022
J. nr.: 22/11009
Viðgjørt: AE
Svar til fyrispurning nr. 52-206/2021 frá Eyðgunn Samuelsen, løgtingskvinnu, settur
landsstýrismanninum í fíggjarmálum, Una Rasmussen, um Strandferðsluna og ferðavinnu í
Kalsoynni.
Fyrispurningurin er soljóðandi:
1. Arbeiðir landsstýrismaðurin við at seta fleiri túrar inn á farleiðina í Kalsoynna?
2. Er ætlanin at broyta ásetingina um, at bólkar yvir 25 fólk ikki kunnu bíleggja pláss við Sam
til og frá Kalsoynni?
3. Um ja, nær kunnu hesar broytingar væntast at verða settar í verk?
Svar til spurning 1
Landsstýrismaðurin fegnast um, at ferðavinnan mennist í Kalsoynni, og at Strandferðslan stuðlar
undir framburði innan ferðavinnu og samferðslu.
Strandferðslan hevur í eina tíð samskift við ferðavinnuna í Kalsoynni, Klaksvíkar kommunu og
onnur um Kalsoyarleiðina, fyri at loysa málið um fólkaflutning, nú ferðafólkatalið er økt so nógv
á leiðini.
Strandferðslan hevur júst broytt ferðaætlanina fyri tíðarskeiðið 13. juni – 1. septembur 2022.
Túratalið á Kalsoyarleiðini er økt, bæði á sjógvi og landi. Nú verða eftir ætlan sigldir 5 túrar afturat
aftur og fram um vikuna, sum merkir, at tað verða sigldir upp til 52 túrar aftur og fram samanlagt
um vikuna. Eisini eru fleiri túrar settir inn á Bygdaleiðum (busssambandið) og er kapasiteturin
tvífaldaður.
Svar til spurning 2
Fyri fleiri árum síðani avráddi Strandferðslan, í samráð við fastbúgvandi á Kalsoynni og á øðrum
útoyggjum, at eitt hámark skuldi setast fyri, hvussu nógv pláss til størri ferðaløg einstakar
ferðaskrivstovur og onnur kunnu bíleggja frammanundan við ferjuni. Endamálið var, at
fastbúgvandi í Kalsoynni skuldu hava betri møguleika at koma við ferjuni.
Sambært Strandferðsluni hevur stovnurin ofta loyvt ferðaløgum við fleiri enn 25 ferðandi á
Kalsoyarleiðina, og eisini loyvt fleiri bólkum samstundis á somu túrum, í samráð við manningina
umborð á Sam.
Um ferðaløg hava verið væl størri enn hetta, til dømis 60 til 90 ferðandi, hevur Strandferðslan
mælt til at leiga skipið til ein eykatúr, so hetta ikki órógvar møguleikan hjá fastbúgvandi og øðrum
ferðandi at ferðast sambært ferðaætlanini. Hetta hevur, sambært Strandferðsluni, riggað væl.

-- 1 of 2 --

F Í G G J A R M Á L A R Á Ð I Ð
Ministry of Finance
2/2
Strandferðslan samskiftir nú við borgarar á Kalsoynni og kommununa um málið. Ynskja tey at
broyta hámarkið fyri ferðaløg til og úr Kalsoy, verður tað eftir ætlan gjørt.
Svar til spurning 3
Ferðaætlanin varð broytt 13. juni 2022.
Tinganes, 16. juni 2022.
Uni Rasmussen
Landsstýrismaður í fíggjarmálum

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Eyðgunn Samuelsen, løgtingsmaður
Svarari: Uni Rasmussen, landsstýrismaður í fíggjarmálum
Evni: Strandferðslan og ferðavinnan í Kalsoynni
Spurningar:
1. Arbeiðir landsstýrismaðurin við at seta fleiri túrar inn á farleiðina í
Kalsoynna?
2. Er ætlanin at broyta ásetingina um, at bólkar yvir 25 fólk ikki kunnu bíleggja
pláss við Sam til og frá Kalsoynni?
3. Um ja, nær kunnu hesar broytingar væntast at verða settar í verk?
Viðmerkingar:
Ferðavinnan er ein týdningarmikil inntøkukelda hjá ferðavinnuaktørum í Kalsoynni,
og nú eru vit við at koma í háárstíð hjá ferðavinnuni. Tað vísir seg tó at vera ein stór
forðing, at ferðafólkabólkar omanfyri 25 fólk ikki kunnu bíleggja pláss, men mugu
leiga bátin, um tey ynskja at tryggja sær pláss. Hetta er sera kostnaðarmikið og hevur
við sær avlýsingar, ið viðføra fíggjarligt tap fyri ferðavinnuna.
Eisini túratalið hjá Sam er ein forðing fyri ferðavinnuna. Vit hava sæð, at áhugin fyri
at vitja Kalsoynna er sera stórur og vaksandi. Sostatt kundi eitt økt túratal – eitt nú um
vikuskiftið – havt við sær fleiri inntøkur bæði fyri ferðavinnuna og Strandferðsluna.
Fyri at fáa greiðu á, hvørjar ætlanir landsstýrismaðurin hevur, og nær nakað hendir á
økinum, verða hesir spurningar settir.
Á Løgtingi, 2. juni 2022
Eyðgunn Samuelsen

-- 1 of 1 --