52-201/2021

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Løgtingið
Svar
uppá
skrivligan fyrispurning nr. 201/2021 eftir tingskipanini § 52a til Bárð á Steig Nielsen, løgmann,
frá Beintu Løwe, løgtingsmanni, um hjálparpakka til láglønt
Fyrispurningurin var soljóðandi:
1. Hvør er orsøkin til, at løgmaður ikki metir tað vera skilagott at veita lágløntum hjálparpakka
beinanvegin?
2. Kann løgmaður nágreina, nær ein hjálparpakki til láglønt og onnur við lágari inntøku kemur.
Svar:
Til spurning 1 og 2
Um verandi gongd heldur fram, verður ein hjálparpakki til láglønt eitt av fyrstu málunum, ið verða tikið
upp á ólavsøku, tá tingið kemur saman aftur.
Landsstýrið fylgir neyvt gongdini í búskapinum, og samskifti er millum Løgmansskrivstovuna,
Fíggjarmálaráðið og Almannamálaráðið um møgulig átøk.
Tað hevur týdning, at møgulig átøk verða fyrireikað væl, so tey raka rætt, og soleiðis at átøkini ikki hava
aðra ótilætlaða ávirkan á búskapin. Somuleiðis er tað avgerandi, at hesi átøk eru tíðaravmarkað og verða
málrættað til teir partar, sum eru harðast raktir av prísvøkstrinum.
Flestu almannaveitingar verða veittar uttan mun til fíggjarlig kor hjá tí einstaka, men verða veittar til
persónar sum lúka objektivar heilsuligar- ella aldurstreytir. Tó eru einstakar veitingar, sum hava til
endamáls at hjálpa einstaklingum og familjum við fíggjarliga trongum korum ella familjum við lágum
inntøkum. Vit eiga at røkka hesum við tillagingum til onkra av verandi skipanum, eitt nú:
• Familjuískoyti
• Persónlig viðbót sbrt. almannapensjónslógini
• Fíggjarligt ískoyti til stakútreiðslur sbrt. almannalógini
• Fyribils uppihaldsveiting sbrt. almannalógini
• Brennistuðul

-- 1 of 2 --

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Higartil kunna vit tó staðfesta, at samlaði prísvøksturin síðani russisku innrásina í Ukraina hevur verið
lægri í Føroyum enn aðrastaðni í Evropa.
Nevnast kann eisini, at fyri góðari viku síðani hava partarnir á privata arbeiðsmarknaðinum skrivað undir
nýggjan sáttmála, og semjan inniber størstu lønarhækkingina í nógv ár. Fyri serliga lægst løntu
løntakararnir er hetta at fegnast um.
Harumframt verða ymiskar upphæddir í almannalóggávuni javnaðar við miðaltalinum av prosentvísu
broytingini í lønarkarminum hjá Fíggjarmálaráðnum, og prosentvísu broytingini í brúkaraprístalinum.
Broytingarnar í brúkaraprístalinum verða javnaðar pr. 1. januar.
Hetta tryggjar, at tey sum hava almennar veitingar sum høvuðsinntøku, eisini fáa vøkstur í inntøkuni, sum
svarar til prísvøksturin í samfelagnum og lønarvøksturin hjá teimum alment løntu.
Við hesum skuldi hædd verið tikin fyri príshækkingini, ið sæst í løtuni. Landsstýrið fylgir tó væl við
gongdini, og um neyðugt verða málrættaði og tíðaravmarkaði tiltøk sett í verk, til tess at hjálpa teimum,
ið fáa almannaveitingar.
Í Tinganesi, 6. juni 2021
Bárður á Steig Nielsen
løgmaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Beinta Løwe Jacobsen, løgtingsmaður
Svarari: Bárður á Steig Nielsen, løgmaður
Evni: Hjálparpakki til láglønt
Spurningar:
1. Hvør er orsøkin til, at løgmaður ikki metir tað vera skilagott at veita lágløntum
hjálparpakka beinanvegin?
2. Kann løgmaður nágreina, nær ein hjálparpakki til láglønt og onnur við lágari
inntøku kemur.
Viðmerkingar:
Inflatiónin í Føroyum er vaksin 4,4 prosent frá fyrsta ársfjórðingi í fjør til fyrsta
ársfjórðing í ár, sæst á heimasíðuni hjá Landsbankanum.
Prísurin á brennievni er methøgur, og prísurin á matvørum er eisini vaksin nógv, og
fer væntandi at halda fram at veksa eina løtu afturat.
Løgmaður var í tíðindasending í Kringvarpinum 23. mai 2022 og segði, at ongin
hjálparpakki er á veg nú, men kanska seinni í ár. Á Facebook-síðuni hjá
Sambandsflokkinum er løgmaður endurgivin fyri at siga soleiðis: "Ein hjálparpakki til
tey, sum eru harðast rakt av inflatiónini, kemur væntandi til politiska viðgerð eftir
ólavsøku"
Fyri at fáa nærri greiðu á hesum máli verður hesin fyrispurningur settur.
Á Løgtingi, 25. mai 2022
Beinta Løwe Jacobsen

-- 1 of 1 --