52-182/2021

U M H V Ø R V I S - O G V I N N U M Á L A R Á Ð I Ð
GONGIN 7 • POSTSMOGA 377 • 110 TÓRSHAVN
TELEFON 30 66 00 • TELEFAX 30 66 65 • E-MAIL: UVMR@UVMR.FO
Løgtingið Tórshavn, tann 6. mai 2022
Tinghúsvegur 1-3 Journal nr. 22/08185
Postboks 208
110 Tórshavn
Svar upp á § 52a fyrispurning nr. 52-182/2021 frá Ingilín Didriksen Strøm, løgtingsmanni,
um endurnýtslustøðir
Spurningarnir vóru soljóðandi:
1. Hevur landsstýrið - saman við kommunum og vinnuni - ætlanir um at skipa
endurnýtslustøðir, ið hjálpa vinnuni at endurnýta tilfar, sum verður blakað burtur í dag?
2. Um ja, nær verður klárt at nýta endurnýtslustøðirnar?
Til nr. 1 og 2
Landsstýrið er ikki beinleiðis í samband við vinnu og kommunur um endurnýtslustøðir í dag,
men landsstýrismaðurin í umhvørvis- og vinnumálum hevur í gjár, 5. mai 2022, sent eina nýggja
kunngerð um burturkast út til hoyring.
Tað nýggja við hesi kunngerðini í mun til galdandi kunngerð er, at hon setur karmarnar fyri
einum undirstøðukervi til meira endurnýtslu og endurvinning av burturkasti frá húsarhaldum og
vinnu, við tí at kunngerðin ásetur, at kommunurnar skulu handfara burturkast sambært fylgjandi
raðfesting:
1) endurnýta,
2) endurvinna,
3) gagnnýta á annan hátt,
4) beina burtur.
Kommunan kann einans víkja frá raðfestingini, um tað er umhvørvisliga grundað.
Ein høvuðstáttur í kunngerðini er, at land og kommunur skulu í samráð gera eina landsætlan fyri
burturkasti, og henni á baki eina kommunala ætlan fyri burturkasti, sum skal seta landsætlanina í
verk. Ætlanirnar skulu galda í 10 ár, men broytingar kunnu gerast í gildistíðini, um tørvur er á tí.

-- 1 of 2 --

U M H V Ø R V I S - O G V I N N U M Á L A R Á Ð I Ð
2/2
Í sambandi við arbeiðið at gera lands- og kommunuætlanina fyri burturkast, fara kommunur og
landsmyndugleikar, við íkasti frá vinnuni, at fáa eina greiðari fatan av, hvussu tilfar frá
vinnuburturkasti best kann endurnýtast ella endurvinnast. Um hetta mál best kann røkkast við
kommunalum endurnýtslustøðum ella við aðrari loysn, fer helst at vísa seg, tá ið ætlanirnar eru
komnar nakað ávegis.
Umhvørvis- og vinnumálaráðið, 6. mai 2022
Magnus Rasmussen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Ingilín D. Strøm, løgtingsmaður
Svarari: Magnus Rasmussen, landsstýrismaður í umhvørvis- og vinnumálum
Evni: Endurnýtslustøðir
Spurningar:
1. Hevur landsstýrið - saman við kommunum og vinnuni - ætlanir um at skipa
endurnýtslustøðir, ið hjálpa vinnuni at endurnýta tilfar, sum verður blakað
burtur í dag?
2. Um ja, nær verður klárt at nýta endurnýtslustøðirnar?
Viðmerkingar:
Tað er komið fram í miðlunum, at nógv gott tilfar hjá vinnuni fer burtur, tí umstøður
eru ikki at endurnýta. Eitt nú snýr tað seg um byggitilfar, men sannlíkt er, at aðrar
vinnur eisini kunnu nýta nýggjar og størri endurnýtslustøðir.
Endurnýtslan hjá Dugna er eitt dømi um eitt væl eydnað átak, har lutir og innbúgv hjá
húsarhaldum verða endurnýtt, tá húsarhaldini ikki hava tørv á teimum longur. Í løtuni
eru fá líknandi alternativ til vinnuliga endurnýtslu.
Tað hevur nógv at siga fyri umhvørvið, at vit leingja um livitíðina á virðismiklum
tilfeingi við at endurnýta tað. Endurnýtsla sparir okkum øllum tíð, tilfar, orku og
pening. Eisini kann hetta vera við til at eggja fyritøkum at leggja sítt virksemi um til
at brúka endurnýtt tilfar, tí tað er ofta einki galið við tilfarinum, ið verður beint burtur.
Umstøðurnar at endurnýta kunnu tískil blíva nógv betri hjá bæði borgarum og
vinnuni. Tí verður hesin fyrispurningurin settur.
Á Løgtingi, 27. apríl 2022
Ingilín D. Strøm

-- 1 of 1 --