52-167/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 26. apríl 2022
J. nr.: 22/07439-9
Viðgjørt: TM
Svar til fyrispurning nr. 52-167/2021 frá Jóhannis Joensen, løgtingsmanni, settur
landsstýrismanninum í fíggjarmálum, Una Rasmussen, um at gera sólpanelskipanir og
eldrivin prutl mvg-frí.
Fyrispurningurin er soljóðandi:
1. Ætlar landsstýrismaðurin at broyta lóggávuna, so eldrivin prutl eisini verða fevnd av
mvg-frítøku eins og onnur motorakfør?
2. Ætlar landsstýrismaðurin at syrgja fyri, at aðrar grønar orkuskipanir so sum sólorka
eisini verða frítiknar fyri mvg?
Svar til spurning nr. 1
Orku-og umhvørvispolitikkurin miðar ímóti, at allur flutningur skal burtur frá fossilum
brennievnum. Vanlig prutl dálka og larma í nærumhvørvinum og økja um útlátið av
veðurlagsgassum. Elbilar fáa mvg-frítøku, tí teir kunnu brúka grøna elframleiðslu í Føroyum og tí
teir koma ístaðin fyri bilar við fossilum brennievni. Elprutl, elsúklir og elmotorsúklir gera tað sama.
Tí fer landsstýrið at umrøða og viðgera hetta nærri.
Svar til spurning nr. 2
Orkupolitikkurin leggur upp til í minsta lagi 40 MW av sólorku í framtíðar orkuskipanini. Hetta er
fyrst og fremst tí, at lítið av regni og vindi er um summarið. Tí er tørvur á aðrari grønari orku um
summarið. Umhvørvisstovan upplýsir, at ein góður háttur at fáa gongd á sólorku er, at privatfólk,
stovnar og virki seta sólorkuskipanir á sínar húsatekjur. Fleiri sólorkuskipanir eru í Føroyum, og tær
vísa seg at rigga væl. Húsarhald, stovnar og virki, sum hava ella fáa sær hitapumpur og elbilar kunnu
fáa enn størri gagn av eini sólorkuskipan. Fáa sólorkuskipanir mvg-frítøku, kemur møguliga ferð á
hetta økið. Landsstýrið fer tí at umrøða og viðgera hetta nærri.
Tinganes, 22. apríl 2022
Uni Rasmussen
Landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Uni Rasmussen, landsstýrismaður í fíggjarmálum
Evni: Gera sólpanelskipanir og eldrivin prutl mvg-frí
Spurningar:
1. Ætlar landsstýrismaðurin at broyta lóggávuna, so eldrivin prutl eisini verða
fevnd av mvg-frítøku eins og onnur motorakfør?
2. Ætlar landsstýrismaðurin at syrgja fyri, at aðrar grønar orkuskipanir so sum
sólorka eisini verða frítiknar fyri mvg?
Viðmerkingar:
Grøna orkuskiftið er heitt kjakevni og verður tað helst eisini frameftir. Øll heimsins
lond gera bindandi avtalur um at leggja um til grønari orkuloysnir og steðga CO2-
útlátinum á klótuni.
Í dag eru fleiri undantøk í mvg-lógini, sum gera tað lættari at skifta til grønar
akfarsloysnir. Tað er greitt, at mvg-frítøkur ikki gagna borgaranum, um søluliðið
hækkar prísin samsvarandi mvg-frítøkuna. Tó vísa frítøkurnar og líknandi átøk, at
fleiri leggja um til grønari orkuloysnir.
Eldrivin prutl eru ikki undantikin mvg, hóast tey eru motorakfør á sama hátt sum
onnur akfør, ið eru undantikin mvg. Mvg-frítøkurnar í meirivirðisgjaldslógini fata
einans um akfør, ið eru fevnd av løgtingslóg um avgjøld við skráseting av
motorakførum, men í lógini um avgjøld við skráseting av motorakførum er greitt
ásett, at hon ikki fevnir um prutl, og tað hóast tey eisini eru eitt slag motorakfari.
Sólpanel eru ein av grønastu orkuloysnunum. Tekniskt, búskaparliga og sum
orkukelda er hetta ein góð loysn fyri húsarhaldið sum hjáorkukelda. Tí kann tað
undra, at ymiskar aðrar orkuloysnir sleppa undan mvg, men ikki sólpanelskipanir.
Tí verður hesin fyrispurningurin settur.
Á Løgtingi, 7. apríl 2022
Jóhannis Joensen

-- 1 of 1 --