52-164/2021

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 20. apríl 2022
Tygara ref.:
Máltal.: 21/08502-97
Svar
upp á
§ 52a fyrispurning nr. 52-164/2021 um starvsnormeringar hjá námsfrøðingum í
fólkaskúlanum, frá Djóna Nolsøe Joensen, løgtingsmanni, settur Jenisi av Rana,
landsstýrismanni í uttanríkis- og mentamálum.
Fyrispurningurin er soljóðandi:
1. Kann landsstýrismaðurin upplýsa, hvussu nógv tað vildi kostað mánaðarliga at sett
námsfrøðingar í føstum starvi, sum arbeiða á serdeildunum á fólkaskúlaøkinum, í fult
starv við setanarbroti á 1,0?
2. Heldur landsstýrismaðurin, at tað er rímiligt, at fast settir námsfrøðingar á serdeildum í
fólkaskúlanum hava lægri setanarbrot samanborið við líknandi námsfrøðingar á
miðnámsskúlaøkinum?
3. Kann landsstýrismaðurin greiða frá og grundgeva fyri, hví setanarbrotið hjá
námsfrøðingum á fólkaskúlaøkinum er væl lægri enn setanarbrotið á
miðnámsskúlaøkinum, tá talan er um serdeildir?
4. Ætlar landsstýrismaðurin at skipa viðurskiftini soleiðis, at námsfrøðingar á serøkinum í
fólkaskúlanum verða settir í fult starv við einum setanarbroti á 1,0 og fáa eins
setanarviðurskifti sum námsfrøðingarnir, sum virka á serdeild á miðnámsskúlaøkinum?
Svar
Til 1: Mánaðarliga vildi tað í eyka lønarútreiðslum kostað umleið 200.000 kr., um allir
námsfrøðingarnir í sertilboðunum á fólkaskúlaøkinum vóru settir í føstum starvi við setanarbroti á
1,0.
Her í apríl 2022 eru tað 25 námsfrøðingar í føstum starvi í teimum 9 sertilboðunum í
fólkaskúlanum. Høvdu øll hesi í dag verið sett við setanarbroti á 1,0, so hevði tað havt við sær eina
øking á 5,3 ársverk, sum svarar til ein eyka kostnað á umleið 2,5 mió. kr. árliga. Hetta er grundað
á ein miðal kostnað á 475.000 kr. árliga fyri hvørt ársverk. Fer serøkið at vaksa komandi tíðina við
øktum næmingatølum í sertilboðunum, so fer lønarútreiðslan við slíkari umlegging at verða enn
hægri.

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo Page 2 of 2
Til 2: Setanarviðurskiftini hjá ymsu starvsbólkunum hava verið ásett soleiðis síðan skipanin
byrjaði. Tað verður ikki raðfest í løtuni at broyta verandi skipan viðvíkjandi áseting av setanarbroti
hjá námsfrøðingum á fólkaskúlaøkinum.
Til 3: Tá serøkið varð umskipað við serflokkum í ávísum skúlum kring landið, varð gingið út frá,
at ein setan á 0,85 hjá námsfrøðingum var tað, ið metast kundi vera rímiligt. Hetta grundað á, at
skúladagurin í serflokkum er avmarkaður sambært kunngerð til at vera á leið frá kl. 8.00 – 13.00.
Skipanin við fastari fyrireikingartíð til hvønn undirvísingartíma, sum lærarar hava, er ikki galdandi
fyri námsfrøðingar. Altso er ein munur á starvsliga innihaldinum hjá námsfrøðingum og hjá
læraranum. Á serbreytunum á miðnámsskúlunum hava øll starvsfólk uttan mun til útbúgving somu
starvstreytir og ábyrgd. Tað merkir, at námsfrøðingar á jøvnum føti við lærarar fyrireika og standa
fyri undirvísingini. Í serbreytunum á miðnámsøkinum er tað leiðsla skúlans, sum ger av, hvussu
nógv tíð skal til fyrireiking, uppfylging og annað, sum part av arbeiðstíðini.
Til 4: Landsstýrismaðurin hevur í løtuni ikki ætlanir um at raðfesta broyting viðvíkjandi
starvsbroti hjá námsfrøðingunum á fólkaskúlaøkinum.
Vinarliga
Jenis av Rana
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Djóni Nolsøe Joensen, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Starvsnormeringar hjá námsfrøðingum í fólkaskúlanum
Spurningar:
1. Kann landsstýrismaðurin upplýsa, hvussu nógv tað vildi kostað mánaðarliga at
sett námsfrøðingar í føstum starvi, sum arbeiða á serdeildunum á
fólkaskúlaøkinum, í fult starv við setanarbroti á 1,0?
2. Heldur landsstýrismaðurin, at tað er rímiligt, at fast settir námsfrøðingar á
serdeildum í fólkaskúlanum hava lægri setanarbrot samanborið við líknandi
námsfrøðingar á miðnámsskúlaøkinum?
3. Kann landsstýrismaðurin greiða frá og grundgeva fyri, hví setanarbrotið hjá
námsfrøðingum á fólkaskúlaøkinum er væl lægri enn setanarbrotið á
miðnámsskúlaøkinum, tá talan er um serdeildir?
4. Ætlar landsstýrismaðurin at skipa viðurskiftini soleiðis, at námsfrøðingar á
serøkinum í fólkaskúlanum verða settir í fult starv við einum setanarbroti á 1,0
og fáa eins setanarviðurskifti sum námsfrøðingarnir, sum virka á serdeild á
miðnámsskúlaøkinum?
Viðmerkingar:
Tað eru níggju sertilboð/serflokkar skipað í Føroyum. Ymiskt er, hvussu hesi
sertilboð/serflokkar eru í stødd og skipan. Felags fyri øll tilboðini er, at tey eru skipað
soleiðis, at ein skúli umsitur sertilboðið og tekur tískil næmingar inn frá einum ella
fleiri skúlum í nærumhvørvinum.
Á sertilboðunum starvast lærarar og námsfrøðingar. Lærararnir í føstum starvi eru
settir við setanarbroti 1,0, meðan flestu námsfrøðingarnir í føstum starvi, hóast fleiri
tímar saman við næmingunum, eru settir við setanarbroti 0,85 ella lægri. Tá talan er
um at menna næmingar á serdeildini, arbeiða námsfrøðingar og lærarar í samráði og
samstarvi í sjálvstýrandi toymi.
Høvuðsuppgávan er at ráðleggja, gjøgnumføra og eftirmeta skúladagin hjá
næmingunum. Arbeitt verður út frá læruætlanum hjá einstaklinginum. Í slíkum arbeiði
er avgerandi, at menningin er ein heildarmenning, har barnið hvílir trygt í, at øll
starvsfólkni hjálpa til, har tørvurin er. Hetta er tó sera torført, tá setanarbrotini til føstu
størvini eru ólík. Tí vildi tað tænt serskipanini á fólkaskúlaøkinum, at
námsfrøðingarnir á serdeildum fólkaskúlans, eins og námsfrøðingarnir á miðnámi,

-- 1 of 2 --

vóru settir við setanarbroti 1,0 og kundu virkað á jøvnum føti saman við lærarunum
og børnunum á serøkinum til frama.
Á Løgtingi, 5. apríl 2022
Djóni Nolsøe Joensen

-- 2 of 2 --