52-159/2021

F Í G G J A R M Á L A RÁ Ð I Ð
Ministry of Finance
Tinganes • Box 2039 • FO-110 Tórshavn
 (+298) 35 20 20 •  fmr@fmr.fo • www.fmr.fo
Løgtingið
Tinghúsvegur 1-3
Postboks 208
110 Tórshavn
Tórshavn, tann: 13. apríl 2022
J. nr.: 22/06979-2
Viðgjørt: ASL/BAB/JS
Svar til fyrispurning nr. 52-159/2021 frá Bjarna Kárason Petersen, løgtingsmanni, settur
landsstýrismanninum í fíggjarmálum, Una Rasmussen, um inntøkur av einskiljingum av
almennum ognum og Búskapargrunnur Føroya.
Fyrispurningurin er soljóðandi:
1. Nær skulu inntøkur av einskiljing av almennum ognum í Búskapargrunnin, sambært lóg
um Búskapargrunn Føroya?
2. Hvat er at rokna sum inntøka av einskiljing av almennum ognum eftir § 2, stk. 2, nr. 2 í
lóg um Búskapargrunn Føroya?
3. Heldur landsstýrismaðurin, at inntøkan av eini møguligari sølu av almenna ognarlutinum
í P/F Smyril Line og P/F Tjaldur eigur at fara í Búskapargrunnin?
Svar til spurning nr. 1 og 2
Hugtakið einskiljing er lýst í frágreiðingini um einskiljingar frá 2001. Einskiljing (privatisering)
merkir at flyta framleiðsluvirksemi úr almenna geiranum til einskilda geiran (privata sektorin).
Seinasta einskiljingin var sølan av LÍV í 2016. Hendan søla varð koyrd í Búskapargrunnin. Í
broyting til løgtingslógina í 2011 skrivar Fíggjarmálaráðið í viðmerkingunum: “Tað eru stórar
eingangs inntøkur av einskiljing, sum ætlandi skulu í Búskapargrunnin”
Svar til spurning nr. 3
Tað er ivasamt, um søla av partabrøvum í vinnufeløgum, sum reka virksemi á haldilsligum
grundarlagi, og har landið eigur ein avmarkaðan ognarlut, kann roknast sum einskiljing, hóast
tað í dagligari talu javnan verður nevnt soleiðis.
Sølan av ognarlutunum í Smyril Line og Tjaldur metir Fíggjarmálaráðið ikki er ein einskiljing og
verður tí ikki serstakt flutt í Búskapargrunnin. Sølan er játtað yvir raksturin á fíggjarlógini,
soleiðis sum samtykt á fíggjarlógini fyri 2022. Her vigar hægri meginreglan, at ein hending skal
viðgerast líka, bæði tá talan er um útreiðslur og inntøkur. Tá landið í 2008 stuðlaði P/F Smyril
Line við 30 mió. kr. varð hetta gjørt umvegis raksturin. Tí verður inntøkan av sølu av
partabrøvum nu eisini tikin yvir raksturin.
Um tað er politiskt ynski um tað, so ber til at koyra søluna av Tjaldur og Smyril Line í
Búskapargrunnin við serligari játtan, eins og gjørt var við serinntøkunum frá
Fíggingargrunninum í 2017.
Tinganes, 13. apríl 2022
Uni Rasmussen
Landsstýrismaður í fíggjarmálum

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Bjarni Kárason Petersen, løgtingsmaður
Svarari: Uni Rasmussen, landsstýrismaður í fíggjarmálum
Evni: Inntøkur av einskiljingum av almennum ognum og Búskapargrunnur Føroya
Spurningar:
1. Nær skulu inntøkur av einskiljing av almennum ognum í Búskapargrunnin,
sambært lóg um Búskapargrunn Føroya?
2. Hvat er at rokna sum inntøka av einskiljing av almennum ognum eftir § 2, stk.
2, nr. 2 í lóg um Búskapargrunn Føroya?
3. Heldur landsstýrismaðurin, at inntøkan av eini møguligari sølu av almenna
ognarlutinum í P/F Smyril Line og P/F Tjaldur eigur at fara í
Búskapargrunnin?
Viðmerkingar:
Til at fíggja keyp av fraktferju og til at rinda veðhaldið fyri P/F Eystur- og
Sandoyartunlar hevur samgongan ætlanir um at selja partabrøvini í partafeløgunum
Smyril Line og Tjaldur. Landsstýrið hevur gjørt eina virðismeting av ognarluti
landsins í Smyril Line, og er hon áljóðandi 79 mió. kr. Ongin virðismeting er gjørd
av partabrøvunum í partafelagnum Tjaldur, men upphæddin á fíggjarlógini fyri
2022 er tann sama, sum var ásett á fíggjarlógini fyri í fjør. Sostatt metir mann at fáa
tilsamans 86 mió. kr. fyri søluna.
Sambært lóg um Búskapargrunn Føroya skulu inntøkur av einskiljingum av landsins
ognum setast í Búskapargrunnin. Ítøkiliga merkir hetta óvanligar eingangsinntøkur, so
sum søla av partabrøvum og søla annars av almennum ognarlutum. Eitt nú varð eitt
serligt vinningsbýti latið eigarunum av P/F BankNordik í 2017, tá ið bankin hevði selt
Vørð í Íslandi og hevði tikið vinnukundavirksemið í Danmark av. Fíggingargrunnurin
lutaði upphæddina víðari til landið, sum koyrdi tað í Búskapargrunnin.
Samgongan ætlar at fíggja keyp av fraktferju og avloysaraskipi, umframt veðhald fyri
P/F Eystur- og Sandoyartunlar, við at selja almenna ognarlutin í P/F Tjaldur og P/F
Smyril Line. Spurnartekin kann tískil setast við, um heimild er til at brúka
eingangsinntøkuna av søluni til at fíggja hesi átøkini, ella um ikki hesar inntøkur av
røttum eiga at fara í Búskapargrunnin sambært lógini.
Á Løgtingi, 31. mars 2022
Bjarni Kárason Petersen

-- 1 of 1 --