52-139/2021

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Løgtingið
Svar
uppá
skrivligan fyrispurning nr. 139/2021 eftir tingskipanini § 52a til Bárð á Steig Nielsen, løgmann,
frá Høgna Hoydal, løgtingsmanni, um nevndarbroytingar í BankNordik
Fyrispurningurin var soljóðandi:
1. Kann løgmaður upplýsa, hvør hevur tikið stig til ætlanina at skifta allar nevndarlimirnar í
BankNordik út, og hvør grundgevingin hjá stigtakarunum er fyri at skifta alla nevndina út í
einum ?
2. Hvør er grundgevingin fyri, at løgmaður hevur tikið undir við ætlanini at skifta alla nevndina í
BankNordik út ?
3. Kann løgmaður upplýsa, hvør strategiin og eigarapolitikkurin hjá landsstýrinum er sum størsti
partaeigari í BankNordik?
4. Tekur løgmaður undir við, at BankNordik rindar stór vinningsbýti til partaeigararnar, sum í
stóran mun fara av landinum?
Svar:
Til spurning 1-2
BankNordik er børskrásett fyritøka. Løgmaður kann tískil ikki endurgeva samrøður, hann hevur havt við
stóru partaeigarar bankans. Løgmaður varð kunnaður av nevndarforkvinnu bankans um innkallingina til
aðalfundin. Eisini hava stóru partaeigarar bankans havt fund um uppskot til nevnd. Stóru partaeigararnir
eru: P/F Tjaldur 5%, Sp/F Framherji 5%, Lind Invest 12%, Protector Forsikring ASA 11% og Føroya
landsstýri 35%. (Samanlagt 68%.)
Innan freistina fyri innkalling til aðalfundin, sendu umboð fyri stóru partaeigarunum sítt uppskot til val
av nevndarlimum.

-- 1 of 2 --

L Ø G M A N S S K R I V S T O V A N
P r i m e M i n i s t e r ´ s O f f i c e
Tinganes - Fo-100 Tórshavn – Faroes
Tel: (+298)306000 – e-mail: info@tinganes.fo - www.lms.fo
Til spurning 3
Landsstýrið arbeiðir við at gera reglur fyri, hvønn leiklut landið skal hava sum eigari í teimum
partafeløgum, sum landið eigur heilt ella lutvíst. Í frágreiðing løgmans á ólavsøku 2021 stendur, at
landsstýrið fer at endurskoða og skipa sín leiklut í partafeløgum og grunnum. Endamálið er, at skilnaður
skal vera millum uppgávurnar, ið landið hevur sum ávikavist eigari og sum fyrisitari av lóggávu og eftirliti,
og at tryggja, at fyritøkurnar hjá landinum verða umsitnar á besta hátt. Arbeiðið er komið væl áleiðis.
Fyri ognarlutin hjá landinum í børsskrásettum fyritøkum, verður kunning um møguliga tillaging av strategi
o.a. latin samsvarandi røttum mannagongdum og lógarkrøvum fyri slíkar fyritøkur, um tað verður aktuelt.
Til spurning 4
BankNordik er ein børsskrásett fyritøka við partaeigarum, ið vænta ávíst avkast. Tað eru stjórn, nevnd
og í síðsta enda aðalfundur bankans, ið gera av, um vinningsbýti skal latast, og hvussu stórt tað í givnum
føri skal vera. Somuleiðis eru tað stjórn og nevnd bankans, ið gera av, hvussu kapitalbygnaðurin í
BankNordik skal vera og harvið, hvussu væl bjálvaður bankin skal vera. Avgerðin er grundað á, hvat
verður mett skilabest fyri virksemi hjá bankanum, og er óheft lutfallinum millum føroyskar og útlendskar
partaeigarar.
Landsstýrið hevur einans 10% av atkvøðunum til aðalfundin, og vinningsbýtið er tilmælt av nevndini.
Tað eru umleið 6.000 føroyskir partaeigarar saman við Føroya landsstýri, sum eiga 59% av partapeningi
bankans. Danskir partaeigarar eiga 21%, og norskir 11%. Síðani er eitt lutfalsliga stórt lop niður til
íslendskar partaeigarar, sum eiga 1%.
Sostatt er meirilutin av partapeninginum á føroyskum hondum, og størsti parturin av vinningsbýtinum
verður útgoldin til eigarar í Føroyum. Tað er at fegnast um. Tað er eisini at fegnast um, at útlendingar
ynskja at gera íløgur í Føroyum, eins og føroyskir íleggjarar, herundir vit øll, sum spara upp til pensjón,
kunnu gera íløgur í aðrar marknaðir.
Í Tinganesi, 16. mars 2022
Bárður á Steig Nielsen
løgmaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Høgni Hoydal, løgtingsmaður
Svarari: Bárður á Steig Nielsen, løgmaður
Evni: Nevndarbroytingar í BankNordik
Spurningar:
1. Kann løgmaður upplýsa, hvør hevur tikið stig til ætlanina at skifta allar
nevndarlimirnar í BankNordik út, og hvør grundgevingin hjá stigtakarunum er
fyri at skifta alla nevndina út í einum ?
2. Hvør er grundgevingin fyri, at løgmaður hevur tikið undir við ætlanini at skifta
alla nevndina í BankNordik út ?
3. Kann løgmaður upplýsa, hvør strategiin og eigarapolitikkurin hjá
landsstýrinum er sum størsti partaeigari í BankNordik?
4. Tekur løgmaður undir við, at BankNordik rindar stór vinningsbýti til
partaeigararnar, sum í stóran mun fara av landinum?
Viðmerkingar:
Um vikuskiftið frættist í Útvarpinum, at øll nevndin í BankNordik skal skiftast út á
aðalfundinum í næstum. Áður varð alment boðað frá, at tveir nýggir nevndarlimir
skulu veljast.
Upplýst varð eisini, at landsstýrið sum størsti partaeigari hevur tikið undir við hesi
knappligu broyting og almennu fráboðan, og at tað er løgmaður, ið hevur tikið
avgerðirnar vegna landsstýrið.
Tað er sera óvanligt, at ein heil nevnd verður skift út við so knappari fráboðan og
enntá í einum so týðandi stovni sum landsins størsta banka, og at ein almenn fráboðan
verður broytt við so stuttum skotbrái.
Tí verður løgmaður biðin um at greiða tinginum frá, hvørjar orsakirnar eru til hetta, og
hvørjar ætlanir og hvønn eigarapolitikk landsstýrið hevur sum størsti partaeigari í
BankNordik.
Á Løgtingi, 8. mars 2022
Høgni Hoydal

-- 1 of 1 --