52-138/2021

U M H V Ø R V I S - O G V I N N U M Á L A R Á Ð I Ð
GONGIN 7 • POSTSMOGA 377 • 110 TÓRSHAVN • TELEFON 30 66 00 • E-MAIL: UVMR@UVMR.FO
Løgtingið
Tinghúsvegur 1-3
Postboks 208
110 Tórshavn
Føroyar
Tórshavn, tann 16. mars 2022
J.nr.: 22/05203-2
At tilskila í svari
Svar upp á § 52a-fyrispurning nr. 52-138/2021 frá Helga Abrahamsen, løgtingsmanni, um
lýsingar fyri rúsdrekka
Spurningarnir vóru soljóðandi:
1. Er tað loyvt at seta lýsingar í føroysku fjølmiðlarnar fyri sølu, skeinking og útflýggjan
av rúsdrekka?
2. Er tað loyvt at skriva tíðindi á føroysku portalunum og bløðunum, ella at gera innsløg í
útvarpi og sjónvarpi, har sagt verður frá, at eitt nýtt slag av øl ella brennivíni er komið
á marknaðin, hvørjum tað smakkar av, í hvørjum sambandi tað hóskar seg best at verða
drukkið, hvat tað kostar, og hvussu sterkt tað er?
3. Hvør er ítøkiligi munurin á tíðindum og lýsingum fyri somu framleiðslu?
Til nr. 1
Tað er greitt ásett í løgtingslóg um innflutning og sølu av rúsdrekka, at [øll] reklama í
føroyskum fjølmiðlum og tíðarritum, útbýting av reklamuseðlum o.t. viðvíkjandi sølu, skeinking
og útflýggjan av rúsdrekka er forboðin.
Til nr. 2-3
Tíðindi kunnu allýsast sum eini boð, ið fortelja móttakaranum nakað, sum hann ikki visti
frammanundan. Eini tíðindi um nýggja rúsdrekkaframleiðslu kunnu tí hava líka stórt
tíðindavirði sum sáttmálasamráðingar, fiskaprísir og seinkingar í flogferðsluni.
Er endamálið at kunna og upplýsa, so er mest sannlíkt talan um tíðindi. Er endamálið hinvegin
vinnuligt, t.d. at økja søluna av ávísari vøru, so er heldur talan um eina lýsing. Markið millum
tíðindi og lýsing kann kortini vera kámt, og tað kann vera trupult at skilja ímillum øðrumegin
tíðindi og hinumegin lýsingar.
Sambært løgtingslóg um marknaðarføring skal tað í lýsingum gerast greitt, at talan er um eina
lýsing. Í flestu førum er brúkarin ikki í iva um, at talan er um eina lýsing, men um lýsingin
hevur tey eyðkenni, sum tíðindi hava, t.d. at ein grein er skrivað sum ein tíðindagrein, skal
sendarin gera brúkaranum greitt, at talan er um eina lýsing. Hetta kann gerast við beinleiðis at
skriva, at talan er um eina lýsing. Hesar reglur høvdu eisini verið galdandi fyri lýsingar fyri
rúsdrekka, um so var, at loyvt var at lýsa við rúsdrekka.

-- 1 of 2 --

U M H V Ø R V I S - O G V I N N U M Á L A R Á Ð I Ð
Tað er lítil ivi um, at tað er loyvt at skriva tíðindi um nýggja vøru, eisini rúsdrekka, á
marknaðinum. Líka lítil ivi er um, at eitt tilmæli til brúkaran um at keypa júst hetta slagið av
rúsdrekka ikki er loyvt eftir reglunum í rúsdrekkalógini.
Spurningurin verður síðani, hvar markið gongur millum tíðindi um rúsdrekka og (ólógliga)
lýsing fyri rúsdrekka.
Brot á ásetingar í rúsdrekkalógini eru politimál, og tað er tí politiið og ákæruvaldið, sum í
fyrstu atløgu skulu meta um, hvørt talan er um ólógliga lýsing ella tíðindi. Í aðru atløgu ger
rætturin av, um tíðindi um rúsdrekka í veruleikanum eru ein lýsing, sum er bannað eftir § 19 í
rúsdrekkalógini.
Umhvørvis- og vinnumálaráðið, 16. mars 2022
Magnus Rasmussen
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Helgi Abrahamsen, løgtingsmaður
Svarari: Magnus Rasmussen, landsstýrismaður við umhvørvis- og vinnumálum
Evni: Lýsingar fyri rúsdrekka
Spurningar:
1. Er tað loyvt at seta lýsingar í føroysku fjølmiðlarnar fyri sølu, skeinking og útflýggjan av
rúsdrekka?
2. Er tað loyvt at skriva tíðindi á føroysku portalunum og bløðunum, ella at gera innsløg í
útvarpi og sjónvarpi, har sagt verður frá, at eitt nýtt slag av øl ella brennivíni er komið á
marknaðin, hvørjum tað smakkar av, í hvørjum sambandi tað hóskar seg best at verða
drukkið, hvat tað kostar, og hvussu sterkt tað er?
3. Hvør er ítøkiligi munurin á tíðindum og lýsingum fyri somu framleiðslu?
Viðmerkingar:
§ 19 í rúsdrekkalógini sigur, at øll reklama í føroyskum fjølmiðlum og tíðarritum viðvíkjandi sølu,
skeinking og útflýggjan av rúsdrekka er forboðin. Men næstan hvørja ferð tá nakrar fløskur av
føroyskum whiskey ella okkurt nýtt slag av øl koma á marknaðin, so stendur tað á portalum og eru
tíðindi ella partur av onkrari sending í Kringvarpinum. Tað eru fáar vørur, sum fáa so góða reklamu
í tíðindarenslinum hjá miðlunum, sum øl og rúsdrekka. Samtíðis er tað ólógligt at hava lýsingar við
somu vørum í somu miðlum. Hetta reisir spurningin, nær tað verður roknað sum lýsing, og um
ókeypis lýsingar, ið verða kallaðar tíðindi, eru lógligar, meðan lýsingar við somu vørum, (ið
framleiðarin skal gjalda fyri), eru ólógligar.
Á Løgtingi, 7. mars 2022
Helgi Abrahamsen

-- 1 of 1 --