52-134/2021

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 9. mars 2022
Tygara ref.:
Máltal.: 21/08503-20
Svar
upp á
skrivligan § 52a fyrispurning nr. 52-134 / 2021 frá Jóhannis Joensen, løgtingsmanni, settur
Jenis av Rana, landsstýrismanni í uttanríkis- og mentamálum, um skúlakort til 10. flokk og
NámX.
Fyrispurningurin er soljóðandi:
1. Hava allir skúlanæmingar, sum ætla sær víðari eftir 9. flokk, somu almennu
ferðamøguleikar til og frá skúla?
2. Er ætlanin at geva NámX og 10. flokkunum somu treytir viðvíkjandi skúlakorti sum
næmingar á miðnámi, eftirskúlum og háskúlum?
Svar
Til 1: 10. flokkur er skipaður ymiskt. Í øllum skúlum, sum hava 8. og 9. flokk, halda næmingarnir,
sum velja at fara í 10. fl., fram í sama skúla, uttan í Hvalbiar skúla, har næmingarnir fara í 10.
flokk í Tvøroyrar skúla, og í Tórshavnar kommunu, har næmingarnir fara í 10. fl. í Nám X í
Eysturskúlanum. Í kommununum, sum ikki hava undirvísing í 8., 9. og 10. flokki, hava
kommunurnar samstarv við aðra kommunu um undirvísing í 8., 9. og 10. flokki.
Nakrar kommunur hava skipað skúlasamstarv um breytir í 10. flokki, m.a. Fuglafjarðar, Sjóvar og
Sunda kommuna hava skipað samstarvið e-nám. Somuleiðis er ávíst samstarv um breytir millum
Vága og Sørvágs kommunu, Tvøroyrar og Vágs kommunu og Runavíkar og Nes kommunu.
Meginreglan er, at kommunan rindar fyri næmingaflutning í fólkaskúlanum sambært § 33, stk. 1-
4 í fólkaskúlalógini, har ásett er í stk. 1, at kommunustýrið skal skipa fyri flutningi millum skúlar
og heim ella nánd av heiminum av næmingum, sum ganga í skúla uttan fyri teirra egnu
bústaðarkommunu. Skyldan at skipa fyri flutningi eftir 1. stk. kann vera lokin við at vísa
næmingunum til almennar ferðslumiðlar ella við at samsýna teimum útreiðslur til egnan flutning.
Kommunur kunnu sambært § 33, stk. 8. søkja um landskassastudning til lutvísa rindan av
útreiðslunum til góðkendar flutningsskipanir eftir 1. stk. Undirvísingarstýrið umsitur

-- 1 of 2 --

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo Page 2 of 2
játtanina, sum vanliga er 50% av góðkendari flutningsskipan, sí kunngerð nr. 115 frá 22.
november 2000 um næmingaflutning.
Harumframt er ásett í lógini, at kommunustýrið skal skipa fyri flutningi í og úr skúla av
næmingum, ið eru sjúkir ella avlamnir, og at kommunustýrið kann skipa fyri flutningi millum
skúlar og heim ella nánd av heimum fyri næmingum, sum ganga í skúla í teirra egnu
bústaðarkommunu eftir hesum reglum:
1) næmingum upp í 3. skúlaár, ið hava longri skúlaveg enn 2,5 km, og eldri næmingum, ið
hava longri skúlaveg enn 3,5 km, og
2) næmingum, ið hava styttri skúlaveg, um so er, at tað er serliga neyðugt fyri tryggleikan hjá
næmingunum í ferðsluni, ella um skúlavegurin er ov torførur.
Kommunurnar hava møguleika at veita næmingum, sum fara í 10. flokk ferðamøguleikar í og úr
skúla við almmennu flutningsskipanini ella at nýta aðra flutningsskipan, um almenna
flutningsskipanin ikki samsvarar við skúladagin hjá næmingunum.
Til 2: Sambært lógaruppskotunum um ferðastuðul til næmingar í frískúlum og eftirskúlum, so eru
tað heimstaðarkommunurnar, sum veita næmingunum ferðastuðul.
Viðvíkjandi næmingum fólkaskúlans, so hava kommunurnar hesa heimild sambært
fólkaskúlalógini, sum víst er á undir spurningi 1, - kommunurnar gera av, um ferðastuðulin verður
veittur sum ferðakort ella við ókeypis flutningi í almennu flutningsskipanini ella við aðrari
flutningsskipan.
Vinarliga
Jenis av Rana
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Skúlakort til 10. flokk og NámX
Spurningar:
1. Hava allir skúlanæmingar, sum ætla sær víðari eftir 9.flokk, somu almennu
ferðamøguleikar til og frá skúla?
2. Er ætlanin at geva NámX og 10. flokkunum somu treytir viðvíkjandi
skúlakorti sum næmingar á miðnámi, eftirskúlum og háskúlum?
Viðmerkingar:
Skúlaskipan okkara er soleiðis háttað, at vit hava skúlaskyldu í 9 ár frá 1. til 9. flokk.
Eftir lokna skúlagongd eru fleiri skúlatilboð opin fyri ungdóminum. Í Føroyum hava
vit miðnámsskúlar, Vinnuháskúlan, eftirskúlar, háskúlar, Húsarhaldsskúlan, NámX og
10. flokkar.
NámX er eitt skúlatilboð skipað á Eysturskúlanum í Havn. Fleiri breytir virka við
samstarvi við miðnámi á Glasi. 10. flokkur kring landið er skipað í størri eindum, har
breytavalið gerst fjølbroyttari. Næmingar úr øllum landinum hava møguleika at ganga
á ymisku skúlatilboðunum.
Ein skipan við skúlakorti til og frá skúla er skipað fyri næmingar, sum ganga á
miðnámi og vinnuháskúlum - og nú á eftirskúlum og háskúlum. Henda skipan riggar
væl.
Skúlatilboðini NámX og 10. flokkarnir eru skúlatilboð eftir loknan 9. flokk, eins og
eftirskúlar og háskúlar. Tí hevði tað verið rættvíst, at allir næmingar, ið ganga á
skúlatilboðnum eftir 9.flokk, fingu somu treytir eftir líkheitsprinsippinum.
Fyri meg er tað eitt ivamál, um tað er av misgáum, at støðan er soleiðis. Fyri at fáa
greiðu á hesum og fyri at fáa landsstýrismannin at tillaga skipanina, verður hesin
fyrispurningur settur.
Á Løgtingi, 28. februar 2022
Jóhannis Joensen

-- 1 of 1 --