52-132/2021

U T T A N R Í K I S - O G M E N T A M Á L A R Á Ð I Ð
Tinghúsvegur 5-7 • Postrúm 3279 • FO-110 Tórshavn
 +298 30 65 00 •  ummr@ummr.fo • www.ummr.fo
Løgtingið
Tinghúsvegur 1-3
Postboks 208
110 Tórshavn
Dagfesting: 2. mars 2022
Tygara ref.:
Máltal.: 21/08502-69
Svar
upp á
skrivligan § 52a fyrispurning nr. 52-132/2021 frá Hervør Pálsdóttir, løgtingskvinnu, settur
Jenis av Rana, landsstýrismanni í uttanríkis- og mentamálum. Um listaliga miðstøð.
Fyrispurningurin er soljóðandi:
1. Hvørjar ætlanir eru við gamla studentaskúlanum í Hoydølum?
2. Er ætlanin at gera gamla studentaskúlan í Hoydølum til eina listaliga miðstøð?
3. Um nei, hvørjar møguleikar sær landsstýrismaðurin fyri sær fyri at fáa eina listaliga
miðstøð?
Svar
Til 1: Endalig støða er ikki tikin til, hvat skal henda við gamla studentaskúlabygninginum í
Hoydølum. Sum kunnugt hava samráðingar verið við Tórshavnar kommunu um eitt slag av
býti, har økið í Hoydølum kring gráa skúlabygningin og parkeringsøkið kring henda verða seld
kommununi, meðan landið so keypir partin hjá Tórshavnar kommunu av ognunum á Frælsinum,
so farast kann undir at gera eitt nýtt kampus á økinum. Aðrar ætlanir verða eisini umhugsaðar í
hesum sambandi, men í løtuni er tað ov tíðliga at siga nakað meiri ítøkiligt um hesar.
Til 2: Sum spyrjaranum allarhelst longu er kunnugt, hevur landsstýrismaðurin gjørt sáttmála við
LISA, so hesi í dag kunnu brúka partar av gamla Sanatoriinum til teirra skapandi virksemi. Harvið
er lív komið aftur í Hoydalar, og tað er til stóra gleði fyri okkum øll. Ongin nágreinilig ætlan
fyriliggur í løtuni um at gera gamla studentaskúlabygningin til listaliga miðstøð.
Til 3: LISA hevur sum sagt fingið part av ognunum í Hoydølum til leigu til sítt skapandi virksemi,
og hetta fegnast mong um. Um endalig semja fæst við kommununa, er ein møguleiki, at LISA og
kommunan gera eitt samstarv um brúk av gráa bygninginum til listalig endamál.
Um eingin semja fæst í lag við kommununa, kunnu onnur uppskot gerast aktuell, m.a. um eitt
víðkað samstarv millum landið og LISA um brúk av bygningunum í Hoydølum.
Vinarliga
Jenis av Rana
landsstýrismaður

-- 1 of 1 --

Skrivligur fyrispurningur
eftir § 52a í Tingskipanini
Spyrjari: Hervør Pálsdóttir, løgtingsmaður
Svarari: Jenis av Rana, landsstýrismaður í uttanríkis- og mentamálum
Evni: Listalig miðstøð
Spurningar:
1. Hvørjar ætlanir eru við gamla studentaskúlanum í Hoydølum?
2. Er ætlanin at gera gamla studentaskúlan í Hoydølum til eina listaliga miðstøð?
3. Um nei, hvørjar møguleikar sær landsstýrismaðurin fyri sær fyri at fáa eina
listaliga miðstøð?
Viðmerkingar:
Í rúma tíð hevur verið tosað um, hvat gamli studentaskúlabygningurin í Hoydølum
skal brúkast til, nú skúlin er fluttur í glæsiliga Glasir. LISA hevur verið úti við
uppskoti um at gera eina listaliga miðstøð og umhvørvi, har listin í Føroyum kann
blóma enn meira. Í uppskotinum varð víst á møguleikar við at framleiða list, at sýna
list, at skapa altjóða netverk og alt møguligt annað. Hesin fyrispurningurin verður
settur fyri at frætta, hvørjar ætlanirnar eru við gamla studentaskúlanum og fyri at
frætta, um tað verður arbeitt við at skapa eina listaliga miðstøð – t.d. í Hoydølum, so
okkara listafólk og føroysk list fær betri umstøður at útfolda seg.
Á Løgtingi, 18. februar 2022
Hervør Pálsdóttir

-- 1 of 1 --