52-123/2021

FISKIMÁLARÁÐIÐ
M i n i s t r y o f F i s h e r i e s
Y v i r i v i ð S t r o n d 1 5 • P . O . B o x 3 4 7 • F O - 1 1 0 T ó r s h a v n • F a r o e I s l a n d s
T e l . ( + 2 9 8 ) 3 5 3 0 3 0 • f i s k @ f i s k . f o • w w w . f i s k . f o
Løgtingið
Tinghúsvegur 1-3
Postboks 208
110 Tórshavn
18. februar 2022
Mál: 22/03033-2
(at tilskila í svari)
Tygara skriv: 52-123/2021
Svar til fyrispurning 52-123/2021 frá Jóhannis Joensen, løgtingsmanni, um landingar
hjá uppsjóvarskipum
Spurningar:
1. Hvørjar avbjóðingar eru við landingartørni hjá uppsjóvarskipum, sum fiska eftir
svartkjafti, makreli og sild, tá fiskaríið er í hæddini?
2. Er tað munur á skipum, sum hoyra til virkini, og skipum, sum ikki eru tongd at
ávísum virki?
3. Metir landsstýrismaðurin, at tað er skilagott, at skip liggja upp til fleiri dagar og bíða
eftir landingartørni?
4. Hvørjar loysnir sær landsstýrismaðurin fyri sær á hesum økinum, soleiðis at skipini
sleppa aftur til fiskiskap sum skjótast?
Svar:
Til nr. 1.
Sum víst verður á í viðmerkingunum til spurningarnar, er tað ein avbjóðing við
landingartørnum, at skip kunnu koma út fyri at bíða leingi eftir at sleppa framat at landa.
Hetta hevur við sær, at skipið missir fiskitíð, at dygdin á fiskinum versnar, meðan bíðað
verður, og kann ávirka prísin, sum skipini fáa.
Til nr. 2.
Fiskimálaráðið hevur ikki upplýsingar um hesi viðurskifti.
Til nr. 3.
Tað hevur verið breið politisk semja um, at øll veiða hjá føroyskum skipum í mestan mun
skal leggjast upp í Føroyum. Hetta var sett í gildi við løgtingslóg um fyrisiting av sjófeingi,
og er endurtikið í sjófeingislógini.

-- 1 of 2 --

FISKIMÁLARÁÐIÐ
2/2
Í samgonguskjalinum hava flokkarnir avtalað, at allur fiskur skal landast í Føroyum, men
tilskilað er, at um móttøkuorkan í Føroyum er avmarkað, skal undantak verða givið.
Í uppskotinum til sjófeingislógina verður sum ein av grundgevingunum fyri
landingarkravinum víst á, at sum mest av fiski skal koma upp á land í Føroyum fyri á tann
hátt at skapa virksemi og arbeiðspláss á landi í Føroyum.
Sjófeingislógin heimilar landsstýrismanninum at gera undantak viðvíkjandi treytini, at
veiðan skal verða landað í Føroyum. Í viðmerkingunum til lógaruppskotið verður í tí
sambandi tilskilað, um móttøkukapasiteturin ikki klárar at fylgja við veiðuni – t.d. vegna
vantandi móttøkukapasitet av svartkjafti í háárstíð.
Tá støða skal takast til, um tað er skilagott, at skip liggja upp til fleiri dagar og bíða eftir
landingartørni, skal landsstýrismaðurin meta um m.a. grundgevingina fyri
landingarásetingini, at sum mest av fiski skal koma upp á land í Føroyum fyri á tann hátt at
skapa virksemi og arbeiðspláss á landi í Føroyum, upp ímóti vansunum hjá skipunum
vegna vantandi móttøkukapasitet.
Tað ber tí ikki til at geva eitt eintýtt svar, hvørt tað er skilagott at gera undantak ella ikki.
Svarið veldst um umstøðurnar, ið eru galdandi – og tær kunnu vera ymiskar til ymiska tíð.
Her kann vera hóskandi at leggja afturat, at landsstýrismaðurin á hvørjum ári, síðani
lógarásetta kravið um landing í Føroyum kom í gildi í 2018, hevur gjørt undantak
viðvíkjandi svartkjafti. Hetta hevur verið gjørt eftir ynski frá skipunum og ásannandi, at tað
ikki hevur verið sloppið undan langari tíð at bíða eftir at sleppa framat at landa.
Frá um mars/apríl og fram til hálvan juni hevur tí verið loyvt øllum føroyskum skipum at
landa alla sína veiðu av svartkjafti uttanlands.
Til nr. 4.
Landsstýrismaðurin fylgir gongdini. Um hann metir, at grundarlag er fyri at geva undantak,
verður tað gjørt við broyting í kunngerðini um landing í Føroyum – kunngerð nr. 170 frá
30. desember 2019.
Árni Skaale
landsstýrismaður

-- 2 of 2 --

Skrivligur fyrispurningur
eftir § 52a í Tingskipanini
Spyrjari: Jóhannis Joensen, løgtingsmaður
Svarari: Árni Skaale, landsstýrismaður í fiskivinnumálum
Evni: Landingar hjá uppsjóvarskipum
Spurningar:
1. Hvørjar avbjóðingar eru við landingartørni hjá uppsjóvarskipum, sum fiska
eftir svartkafti, makreli og sild, tá fiskaríið er í hæddini?
2. Er tað munur á skipum, sum hoyra til virkini, og skipum, sum ikki eru tengd at
ávísum virki?
3. Metir landsstýrismaðurin, at tað er skilagott, at skip liggja upp til fleiri dagar
og bíða eftir landingartørni?
4. Hvørjar loysnir sær landsstýrismaðurin fyri sær á hesum økinum, soleiðis at
skipini sleppa aftur til fiskiskap sum skjótast?
Viðmerkingar:
Tað er javnan frammi, at skip eru noydd til at bíða eftir landingartørni, tá fiskaríið
eftir uppsjóvarfiski er í hæddini. Tað er serliga torført, tá útlendsk uppsjóvarskip eisini
landa í Føroyum.
Tað kann eisini gerast ein avbjóðing hjá skipunum, sum ikki hoyra til ávís virki, tí tey
kunnu lætt enda aftast í landingarbíðirøðini. Hetta merkir, at tey ofta bíða longur.
Viðhvørt skipar Fiskimálaráðið soleiðis fyri, at landast kann uttanlands í styttri
tíðarskeið.
Tað er onki yvir at dylja, at tað er ein avbjóðing, um skip mugu bíða leingi. Bæði tí, at
tað stjelur tíð frá fiskarínum, og tí at dygdin á fiskinum minkar fyri hvønn dag, ið
gongur. Harvið selja skipini fyri verri prís.
Fiskaríið eftir svartkjafti er í hæddini, og tí koma nógv tons upp á land komandi
tíðina. Veðrið hevur verið stak vánaligt og hevur hetta tarnað fiskiskapinum.
Avbjóðingin er tó javnan, at skip mugu bíða í dagar eftir landingartørni.
Fyri at fáa at vita, hvat landsstýrismaðurin ætlar at gera við hesa afturvendandi
avbjóðing, verður hesin fyrispurningur settur.
Á Løgtingi, 8. februar 2022
Jóhannis Joensen

-- 1 of 1 --